‘Geen spesiale Australiese visums vir wit SA boere’

Julie Bishop, Australië se minister van buitelandse sake (Foto: Manuel Elias/United Nations via AP)

Australië het geen planne vir ʼn spesiale visum vir wit Suid-Afrikaanse boere wat geweld en vervolging wil ontvlug nie, het Julie Bishop, minister van buitelandse sake in dié land, Sondag gesê.

Peter Dutton, Australiese minister van binnelandse sake, het ʼn diplomatieke geskil met die Suid-Afrikaanse regering veroorsaak toe hy vroeër vandeesweek aangevoer het dat wit boere in Suid-Afrika “spesiale aandag” van ʼn “beskaafde land soos Australië” moet kry om vervolging te ontvlug.

Bishop het egter aan die uitsaaier ABC gesê daar is geen planne om wit boere prioriteit te gee oor ander humanitêre visum-aansoeke nie. “Ek glo die humanitêre program se geloofwaardigheid lê juis daarin dat dit nie diskriminerend is nie en dat elke aansoek op meriete gekeur word,” het sy aan die ABC se “Insiders”-program gesê. “Dit was die geval onder die Turnbull-regering, en so ver as wat ek weet, is daar nie enige planne om dié visumprogram te verander nie.”

Die Suid-Afrikaanse regering het ʼn verduideliking van Australië se hoë kommissaris in Pretoria geëis ná Dutton se uitlatings Woensdag in die Daily Telegraph gepubliseer is.

Lees alle vorige berigte oor Peter Dutton op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

64 Kommentare

jongste oudste gewildste
Ella

Ag ja net soos hier praat die departemente nie met mekaar voor n aankondiging gemaak word. Al die opgewondenheid van boere en ander en woede van die regering pure verniet.

Paul

Hul minister van binnelandse sake het een siening, dit wat hy graag wil sien wat positief in die land gebeur, hul minister van buitelandse sake, wil meer diplomaties wees, want sy moet haar aan die lande waarmee hulle betrekkinge het verantwoord, so sy moet ‘n balanseertoer uithaal, maar haar President stem nogal met die minister van binnelandse sake saam, want binnelands is dit die boodskap van regverdiging wat jy aan jou kiesers gee.

Kobus

Ek dink die opmerkings van Dutton was ongepas en uit plek uit … hy gee geen oplossing vir die ander 4 miljoen wittes in Suid-Afrika nie, en nie net dit nie, hy wil ons eervolle hardwerkende boere as “farm workers” inbring in Australië, tipies van hulle attitude teenoor ons ou “third world country”. Sies … Ons gaan hier bly en ons eie oplossing vind!

Eish

Dutton het gesê hul gaan daarna kyk, nie dat dit reeds in werking is nie.
Miesies Bishop sê nou net dat ons almal n gelyke kans het onder bestaande wetgewing.
Woordgimnastiek of die sinoniem, politiekery.

Wanda

Ons is op die Vader en ons geloof hier om te bly. Om op mense en ander lande staat te maak gaan ons nie help nie, maar ons moet in geloof baie sterk staan en terug keer na ons waardes. God sal ons nooit verlaat, Sy woord herhaal dit 100de kere, maar bekeer julle en draai weg van die wereld en sy gruwels.