Geen sterftes weens Omikron nog aangemeld

(Foto bloot ter illustrasie: JAM STA ROSA / AFP)

Die Omikron-variant is reeds in 40 lande bevestig maar nog geen verwante sterftes is aangemeld nie, sê die Wêreldgesondheidsorganisasie (WGO).

Die VSA, Australië en Chili is van die jongste lande om gevalle van Omikron te bevestig nadat die variant verlede week bevestig is en sedertdien die totale aantal infeksies in Suid-Afrika verby die drie miljoen- merk gestoot het.

Die WGO hou vol dit kan nog weke neem om te bepaal hoe aansteeklik die variant is, of dit erger siekte veroorsaak en hoe doeltreffend entstowwe daarteen is.

“Ons gaan die antwoorde kry wat almal daar buite nodig het,” sê Michael Ryan, uitvoerende direkteur van die WGO se program vir gesondheidsnoodgevalle.

Die WGO het tot op hede nog geen verslae gesien rakende sterftes wat met Omikron verband hou nie. Daar word wel gevrees dat dié variant meer as die helfte van Europa se Covid-19-gevalle in die volgende paar maande gaan veroorsaak.

Op tuisbodem toon voorlopige navorsing deur Suid-Afrikaanse navorsers dat die Omikron-variant drie keer meer geneig is om herinfeksie te veroorsaak in vergelyking met die Delta- of Beta-variant.

Suid-Afrikaanse dokters het intussen ’n styging opgemerk in die getal kinders jonger as vyf jaar wat in die hospitaal opgeneem is sedert Omikron bevestig is. Die dokters meen egter dit is nog te vroeg om te weet of jong kinders veral vatbaar is.

“Naas infeksie by dié ouer as 60 is die voorkoms by kinders jonger as vyf nou die tweede hoogste,” sê Wassila Jassat van die Nasionale Instituut vir Oordraagbare Siektes (Nios).

Chili is die jongste land om die voorkoms van Omikron te bevestig. Die land het Saterdag sy eerste geval van die variant by ’n reisiger opgemerk wat einde verlede maand van Ghana in Chili aangekom het.

Die reisiger is egter ten volle ingeënt en in goeie gesondheid, sê die plaaslike gesondheidsowerhede.

Omikron en die ekonomie

Kristalina Georgieva, hoof van die Internasionale Monetêre Fonds, waarsku dat die nuwe variant wêreldwye ekonomiese herstel kan vertraag, net soos die Delta-variant vroeër gedoen het.

“Selfs voor die koms van hierdie nuwe variant was ons bekommerd dat die herstel, terwyl die pandemie voortduur, ietwat momentum verloor.”

“ʼn Nuwe variant wat baie vinnig kan versprei, kan vertroue knou,” meen Georgieva.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

33 Kommentare

jongste oudste gewildste
miavos

Suid-Afrika het wêreldwyd naam gemaak. Suid-Afrikaanse wetenskaplikes was die eerste wat die Omicron-variant geïdentifiseer het en dit onmiddellik aangemeld het. Geen politiek. Knap gedaan!

Pieter

Hoekom al die paniek? Kom oor Covid. Berig liewer elke dag wat die werkloosheidskoers is. Ek het geen vriende wat aan Covid dood is nie, wel wat van armoede swaar kry agv die Covid-ekonomie.

Nie Verbaas

Nou watter variant het die sodanige 21 aan gesterf soos aangemeld in die vorige berig as WGO nog geen sterftes vir Omicron variant gesien het nie? Is hulle werklik aan COVID dood of ander siekte of kondisie?

Shakespeare

Statistieke in die wêreld vat ek maar met ‘n knippie sout maar in ANC/EFF land vat ek dit met ‘n 50kg sak sout.

annie

My opinie is dat Omikron soos sy naam ‘oud’ aandui, sedert die begin van die pandemie teenwoordig was as die sg ligter vorm van covid. Dit is nou eers uitgewys/opgetel. Om te sê dit is nie gevaarlik nie maar dit is gevaarlik, ons weet nie veel daaroor nie, maar ons gaan vir ewig daarmee opgeskeep sit, vlieg maar rond maar bly eerder tuis is… Dit word nou ‘n swart-komedie werklik waar soos ná die Swart Griep toe mense orals begin dans het totdat hul omval weens ‘n glo spinnekopbyt… so is aangevoer.