Geen Woolies-kalkoen vir Kersfees

(Argieffoto)

Suid-Afrikaners wat normaalweg tydens Kersfees aan ʼn vet gestopte kalkoen van Woolworths smul, sal vanjaar hul jaarlikse plesier elders moet aanskaf.

Talle Woolworths-liefhebbers het kopgekrap nadat kennisgewings in winkels opgesit is oor die skynbare tekort aan kalkoene. Hierin vra die winkel om verskoning dat hulle nie in staat is om hierdie feesseisoen heel bevrore kalkoen te verskaf nie, aangesien hulle dit nie in die hande kan kry nie.

ʼn Woordvoerder van Woolworths het Donderdag aan Maroela Media gesê dat dié multinasionale kos-en-kleinhandelmaatskappy nie vanjaar bevrore kalkoene in hul Suid-Afrikaanse winkels gaan verkoop nie.

“Aangesien daar nie ʼn kalkoenbedryf in Suid-Afrika is nie, word al ons heel bevrore kalkoene vanaf betroubare verskaffers in Europa ingevoer.

“Ons kan dit egter nie vanjaar invoer nie, weens  ʼn uitbreking van voëlgriep in ʼn aantal lande in Europa, waarvandaan ons voorraad ontvang,” sê die woordvoerder.

Die kennisgewing wat by Woolworths se koswinkels aangebring is. (Foto: Megan Swart/Maroela Media)

Suid-Afrikaners hoef hulle egter nie te bekommer nie, want bevrore kalkoene kan steeds by groot supermarkte soos Checkers en Shoprite aangekoop word.

Hoewel voëlgriep nie dodelik is vir mense nie, versprei dit soos ʼn veldbrand onder huishoudelike en wilde voëls wat dikwels tot grootskaalse vrektes lei.

Verskeie handelsvennote vereis eers sertifisering dat daar geen voëlgriepgevalle in die uitvoerder se land is nie, voordat ʼn verskaffer van ʼn ander land dit kan invoer.

“Ons verskaffers deel ons verbintenis tot dierewelsyn, voedselveiligheid en gehalte, daarom sal ons nooit hierdie waardes wil verontagsaam nie,” sê Woolworths se woordvoerder.

The Guardian het onlangs berig dat verskeie gevalle van voëlgriep in Europa en Asië by die Wêreldgesondheidsorganisasie (WGO) aangemeld is.

Noorweë het onlangs dié griep onder 7 000 voëls opgemerk, terwyl die Belgiese, Franse en Nederlandse regerings die land op ʼn lys van lande met ʼn verhoogde risiko vir voëlgriep geplaas het.

Vroeër vandeesmaand het Brittanje ʼn voëlgriepvoorkomingsone gestig wat wetlik vereis dat alle voëlbewaarders streng bio-sekerheidsmaatreëls volg, nadat ʼn trop pluimvee naby Dundee in Skotland van kant gemaak is in reaksie op ʼn voëlgriepuitbreking.

Indien voëlgriep nie in bedwang gebring word nie, kan dit ʼn ernstige gevaar vir die wêreld se voedselsekerheid inhou.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

26 Kommentare

JohanNL ·

Ja ek stem saam! Nes vliegtuie, gloeilampe en die Internet.

VaalDonkie ·

Ek weet nou nie waarom mense my afduimpies gee nie. ‘n Gebakte kalkoen is heerlik. Of ek rook hom sommer vir ‘n paar uur.

JohanNL ·

Ja Vaaldonkie, ek verstaan ook nie. Ekt net net nog ‘n paar Amerikaanse “dinge” genoem en ook ‘n handvol afduimpies gekry. Laat dit maar soos water van ‘n kalkoen se rug afgly ;)

Aai ·

Wie het nog geld vir daai plek PICK & PAY en Checkers se rakke ook netjies die dae en baie goedkoper.

Eclectus ·

Ek eet eksklusief Woolies avos maar daarvoor moes ek my Ferrari prysgee.

Peter Pan ·

Seker mense wat dink hulle is van die USA hahaha of mense met baie geld?

Pieter ·

Baie van daai upstairs tannies wat net in woollies gesien wil word. Wonder of hulle weet die NG Kerk boikot woolies.

Blikkies ·

Ek het nie grootgeword met kalkoen vir kersfees nie, en eet dit ook nie nou nie, Die wat ek wel al geproe het maar aan die droe kant. Ek koop in elk geval niks by Woolies nie want hulle is te duur. Ek is gelukkig met n hoendertjie dankie.

JuanRe ·

Woolies is glad nie duur. Checkers, PnP en Spar se pryse is dieselfde as Woolies en partykeer is Woolies nog goedkoper ook. Maar ongelukkig kom niemand by Woolies se kwaliteit nie.

JohanR ·

Ek en my kalkoen broers en susters se dankie Woolworths. My bees, hoender en eend broers en susters se ook dankie dat daar nie ‘n hoender, in ‘n eend, in ‘n kalkoen in ‘n bees die jaar sal wees nie.

Rika ·

Kalkoene by groot supermarkte is dan verseker laasjaar se stock?? Dis heeljaar besokikbaar in lokale supermark net om die draai….

Konrad1226 ·

Neem ‘n hoender en stop hom vol weense worsies. Sommer daardie rooi worsies wat lyk soos kalkoenlelle. Word gespesifiseer as “poultry”. Daarby diskrimineer WW skynbaar teen sekere groepe wat werksgeleenthede aanbetref. Gelukkig het ek ‘n keuse waar
ek wil koop.

Pieter ·

Al die rakke moet leeg wees ek wil dan sien waar gaan ouer people kos kry. Hulle het mos nie die boere nodig nie hulle gaan mos net spar toe of pickpay toe

annie ·

Kalkoene is hoeka onsmaaklik. Selfs hoeders op Kersdag is so-so. Die manier wat pluimvee geteister word deur boere om groot geld te maak, kan bevraagteken word. Die arme voëls sien skaars die daglig en word volgeprop met gm-graan, later met water om die gewig verder op te stoot en dan wil ons die Vader aan tafel dank vir die gestorwene se proteïne nadat dit skaars geleef het.

Antjiepat ·

Nog nooit die tradisie gevolg nie, die voëltjie is volgens my persoonlike smaak in elk geval te droog. Nee gee my liewers ‘n lekker gebraaide skaaptjop.. water my mond nou

Carolina ·

Dankie, hierdie arme kalkoene word wreedaardig geforce feed! Koop nooit kalkoen nie sal dit nie mis nie

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.