Gemeenskap geskok ná ‘plaasaanvallers’ vrygelaat is

(Foto: Yolandi Kruger)

Die drie vermeende rowers wat op 24 Julie in hegtenis geneem is nadat hulle vermoedelik op ‘n plaas buite Ottosdal, Noordwes, waar Sarel en Hannetjie van Zyl woon, toegeslaan het, is skaars twee weke later op ʼn waarskuwing vrygelaat. Die familie en gemeenskap is hewig ontsteld daaroor en voel geregtigheid moet geskied.

Volgens Henry Mamothame, woordvoerder van die Nasionale Vervolgingsgesag (NVG) in Noordwes, is die drie verdagtes, onderskeidelik 19, 23 en 27 jaar oud, op 4 Augustus op ’n waarskuwing vrygelaat, nadat hulle in die hof verskyn het vir aansoek om borgtog.

Mamothame sê die ondersoekbeampte het nie die borgtogaansoek teengestaan nie. Die staat het gevra dat borgtog betaal moet word, maar die hof het hulle toe net op waarskuwing vrygelaat. Die verdagtes het geen borgtog betaal nie.

“Volgens die inligting in die polisie se dossier is niemand aangerand nie en was dit nie ʼn plaasaanval nie. Die saak is uitgestel vir verdere ondersoek, aangesien die identiteit van die beskuldigde deur middel van ’n uitkenningsparade vasgestel moet word,” sê Mamothame.

Maroela Media het vroeër berig drie mans het die betrokke dag omstreeks 09:00 op die plaas aangekom terwyl Sarel nog gelê en slaap het. Sarel was in daardie stadium siek in die bed. Die mans het die tuinier by die watertenk vasgebind en ’n vuurwapen op hom gerig. Hulle het daarna die huis binnegegaan.

Die drie mans het die kamers van die huis ingevaar en die kaste deursoek. Een van hulle het iets in een van die kamers laat val, wat Sarel laat wakker skrik het. Toe hy sy oë oopmaak, het die mans by die kamerdeur gestaan. Hy het sy vuurwapen, wat langs hom op die bedkassie gelê het, gegryp, maar het eers gesukkel om die vuurwapen uit die holster te kry. Die aanvallers het net daar in hul spore omgedraai en uit die huis gevlug.

Sarel het opgespring en met die vuurwapen die mans agternagesit. Hy het buite skote in die lug afgevuur.

Die verdagtes het weggekom, maar is net voor 12:00 deur lede van die gemeenskap, boere en die polisie aangekeer.

Die polisie het nog nie die verdagtes se vuurwapen gevind nie.

Volgens ʼn familielid wat op voorwaarde van anonimiteit met Maroela Media gesels het, is die familie geskok en ongelukkig dat die verdagtes reeds op vrye voet is.

Sarel het self aan Maroela Media sy misnoeë oor die situasie uitgespreek. Hy sê hy probeer nog die trauma van die aanval verwerk. “Dit is maar ’n skok op jou lyf,” sê hy.

’n Verteenwoordiger van die Ottosdal-911-noodgroep, wat gehelp het om die aanvallers vas te trek,  vertel boere en lede van die gemeenskap wat mense se veiligheid op die hart dra, het Dinsdag met die Lichtenburg-polisie vergader om duidelikheid te kry waarom die verdagtes vrygelaat is. Hulle gaan eerskomende Maandag weer ’n vergadering met die polisie hou om planne in te stel oor die opskerping van landelike veiligheid.

Die verteenwoordiger sê die Ottosdal-911-noodgroep doen ook alles van sy kant om veiligheid te verseker.

“Ons doen ’n beroep op die mense en boere van die gemeenskap om paraat, oplettend en wakker te wees. Ons vra hulle om vinnig ’n noodkreet uit te reik as hulle enigsins in gevaar voel of onraad merk.”

Die 911-noodgroep het ook ’n datastelsel ingestel sodat boere die groep so vinnig moontlik in kennis kan stel oor ’n moontlike aanval.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

35 Kommentare

jongste oudste gewildste
Kokerboom

Dis nogal skokkend. Miskien loslating te wyte aan feit dat tronke vol is

Sarel

Op verskeie terreine laat die Regstelsel die Burgery in die stek. Nie net in die geval nie maar verskeie ander sake ook. Hoekom was hulle nie asngehou tot uitkenningsparade nie.

Alet

My mond hang oop …ek het nie woorde nie….Hierdie land se wette is om van te lag. Daar word nie voorbeelde van hulle gemaak nie want hulle het die regte velkleur.

Genis

Daar is n paar sake hier- rig van vuurwapen, was die vuurwapen gelensieer. Betreeding, inbreak, ents…Patetiese regstelsel, dien die skelms…nie die weerlose belasingbetaler nie…

Adam Adriaan

Sal liewer nie kommentaar lewer oor die regstelsel nie