Gemeenskap staan saam ná seun (3) byna verdrink

Nico Mostert sterk in die hospitaal aan. Foto: Verskaf

Nico Mostert sterk in die hospitaal aan. Foto: Verskaf

ʼn Ma se angswekkende noodoproep Sondagmiddag, nadat sy haar driejarige seun uit ʼn swembad gehaal het, het ʼn hele plaasdorpgemeenskap laat hande vat om sy lewe te red.

Klein Nico se ouers, Mary (37) en Neels (35) Mostert, woon sedert Oktober by Neels se broer op Sundra in Mpumalanga, waar Nico byna in die swembad by die huis verdrink het.

Mary het Maandag aan Maroela Media gesê sy was omstreeks 16:00 in die kombuis besig om die kinders kos te gee, toe sy ʼn oproep ontvang oor ʼn familiekrisis.

“Die sein is baie swak in die huis en ek moes buite toe gaan vir beter opvangs en is by die voordeur uit,” het Mary emosioneel gesê.

Terug in die huis het sy besef Nico is nie in die kombuis of by sy pa nie. “My eerste reaksie was om in die swembad te gaan kyk. Hy het by die agterdeur uitgeglip terwyl ek buite was en in die swembad geval. Ek het hom daar in die diep kant sien dryf. Hy was blou en pap.”

Dit is nie bekend hoe lank hy in die water was nie. Mary het dadelik om hulp geroep en Nico uit die water gehaal. Neels het begin noodhulp toepas, terwyl Mary hulp oor die gemeenskapsradio ontbied het.

“Help asseblief, my kind is dood, my kind is dood, Here help asseblief!” het Mary histeries oor die radio geroep.

Binne ʼn minuut was Derek Bester, voorsitter van die plaaslike buurtwag, die Sundra Rietkol Bulldogs en Derek Meyer, ook van die buurtwag, by die erg getraumatiseerde ouers.

Bester het Maandag aan Maroela Media vertel hulle het Nico dadelik op sy sy gedraai in ʼn poging om die water uit sy lugweë te kry. Die twee mans het dadelik noodhulp begin toepas, terwyl Bester ʼn helikopter ontbied het om die seun dringend by ʼn hospitaal te kry.

“Daar was egter nie ʼn helikopter beskikbaar nie. Ek het geweet ons speel vir tyd en het toe toestemming by die seun se ouers gevra of ons hom in my bakkie na die Parkland-hospitaal in Springs kon haas,” het Bester gesê.

Bester het bestuur, terwyl Meyer en nog ʼn buurtwaglid aanhou noodhulp toepas het.

“By die hospitaal is Nico dadelik in die ongevalle-eenheid opgeneem, waar die personeel goeie werk verrig het. Die seuntjie was volgens die skale wat dokters gebruik, op vlak 4 toe hy opgeneem is. Vlak 3 is breindood. Met die behandeling en medikasie is hy tans op vlak 7, wat stabiel is.”

Nico se ouers het nie ʼn mediese fonds nie en duisende rande moes inderhaas ingesamel word om hom in die hospitaal se waakeenheid te laat opneem. “Ons het weer die gemeenskapsradio ingespan om skenkings te vra en ek het begin huil toe ek die reaksie sien,” het Bester gesê.

Hy het gesê die gemeenskap het in toue by kitsbanke gestaan om geld te trek om aan die gesin te skenk vir Nico se mediese onkostes. Meer as R80 000 is binne ure ingesamel en Nico is na die waakeenheid oorgeplaas.

Nico word tans steeds daar behandel en is aan ʼn asemhalingsmasjien gekoppel en in ʼn geïnduseerde koma geplaas. Volgens Mary kry Nico ligte stuiptrekkings maar reageer hy as mense hom aanraak.

“Die dokters gaan vanaand begin om hom stelselmatig by te bring. Hy kan darem self asemhaal. Hy gaan more vir breinskanderings om vas te stel of hy breinskade opgedoen het.”

Mary het in trane uitgebars toe sy oor die gemeenskap se betrokkenheid en optrede uitgevra is.

“Ek kan nie beskryf hoeveel almal se hulp vir ons beteken nie. As dit nie vir die twee Dereks se vinnige optrede was nie, het ek nie meer my seun gehad nie. As dit nie vir almal se ruim harte en donasies was nie, sou ons hom nie in die private hospitaal kon laat behandel het nie. Ek wil net baie dankie sê aan almal wat gehelp het, almal wat gebid het en steeds bid en almal se bystand. Ek is moedeloos en verwyt myself oor wat gebeur het en waardeer almal se omgee en boodskappe van bemoediging,” het sy bygevoeg.

Bester het gesê die buurtwag behartig die fonds wat gestig is om met Nico se mediese onkostes te help. “Daar is egter nog baie onkostes. Ons het tans net genoeg om hom vir twee dae in die waakeenheid te hou en dus duur ons poging om fondse in te samel, voort.”

Hy het verder gesê dit was wonderlik om te sien hoe die gemeenskap in ʼn tyd van nood saamgekom het om die lewe van ʼn kind te red en hy het die hele gemeenskap uit die diepte van sy hart bedank.

Enigiemand wat wil bydra tot Nico se mediese onkostes, kan Bester kontak by 082 923 7027.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

25 Kommentare

jongste oudste gewildste
Alida

Ag nee man nie nog n kind nie. Mense hou julle oe 24/7 op die klein kindertjies. Siestog man.

anoniem

Dit het met ons ook gebeur… Ons kind was dood. Maar God haar terug gegee sonder enige komplikasies gebid en Goedheid ervaar God is liefde!!! Sterkte aan die gesin moeilike situasie wat mens nie gou vergeet nie en dit Kan met ENIGE iemand gebeur Bid vir julle !!!!

Sharisca

Ons bid vir jou boeta !! Liewe Jesus is aan jou sy …Hoop jy gaan sommer n spoedige genesing hê… Ongelukkig gebeur n ongeluk so vinnig,Dis nie altyd die ouers se skuld nie,Die wat nou wil vinger wys…Ek is baie erg oor veiligheid en hou my kinders met n valk oog dop,maar weereens kan dinge binne n oogwink gebeur. Ons het gisteraand by my ouma gaan kuier,ons seuntjies was by ons en ons groet mekaar buite die huis oppad hek toe en nog voor ek kon keer is my 3 jarige by die hek uit in die hoofstraat in wat… Lees meer »

Anonieme ouma

Mag ons Hemelse Vader vir klein Nico aanraak en hom volkome gesond maak. Dit is wonderlik om te sien daar is nog so baie mense wat met hart en siel omgee. Hier gaan dit om ‘n kindjie se lewe! Wat het dobbel daarmee te doen? Die ouers was by die huis toe dit gebeur het. Maak seker jy vee eers voor jou eie agterdeur want God slaap nie en sondetjies kruip baie gou uit as mens begin vinger wys.

ada

Ek hoop die seuntjie herstel ten volle.