‘Generiese bewoording’ lei tot toelatingsherrie oor topstudent

Die universiteit van Kaapstad. (Foto: UK)

“Dit gaan oor my pragtige kind wat 12 A’s in matriek het. Julle het geen benul waardeur hy in die Covid-19-tyd was om hierdie resultate te lewer nie.”

Só het Mari-Anna Kühn Dinsdag gesê nadat ʼn storm losgebars het oor haar seun Michiel se aansoek by die Universiteit van Kaapstad (UK).

Die 19-jarige Michiel was Paul Roos Gimnasium se toppresteerder vir 2020 en het onder meer by die UK aansoek gedoen om medies te studeer – en het toelating daar gekry. Hy het daarna besluit om eerder BCom Aktuariële Wetenskappe aan die Universiteit Stellenbosch (US) te gaan studeer en het nie die UK voor ʼn gegewe spertyd aanlyn laat weet dat hy nie die aanbod aanvaar nie.

“Ja, hulle het ons gebel. Ons het nie betyds teruggebel nie en dit was ons fout.”

Kühn sê hulle het die universiteit se brief vroegaand op Woensdag 10 Maart ontvang waarin die UK sê Michiel se aansoek is deeglik geassesseer, maar hy het nie plek in die program gekry nie omdat sy aansoek kwansuis nie “mededingend” is nie.

Dit was die bewoording van hierdie brief wat Kühn dwars in die krop gesteek het. Sy sê sy het dit op haar Facebook-blad saam met Michiel se punte gedeel – en van daar af het die situasie handuit geruk.

Sy het die UK die volgende dag herhaaldelik probeer bel om vas te stel waarom Michiel oënskynlik op meriete afgekeur is.

“Die dame by die skakelbord het net gesê die toelatingskantoor neem geen oproepe nie. Ek het gevra vir die sekretaresse van die dekaan van die mediese fakulteit en moes toe weer verneem dat hulle ook nie oproepe neem nie.

“Ek het versoek dat sy my terugbel oor die brief. Tot op hede het niemand van die UK se toelatingskantoor – wat die brief onderteken het – óf die sekretaresse my teruggebel nie.”

Kühn sê hulle was nie bewus daarvan dat Michiel die aansoek aanlyn van die hand moes wys nie. Sy sê ander universiteite het verdere navraag gedoen nadat Michiel nie sy plek daar opgeneem het nie.

“[Die UK] se openbare betrekkinge is nie reg nie. Om daardie brief te kry en te hoor jy is nie goed genoeg nie … Hulle moes nie daardie brief uitgestuur het nie, die bewoording daarvan is heeltemal verkeerd.

“Ek het nooit hierdie plasing vir politieke gewin gemaak nie.”

Sy sê dít was die rede waarom sy die brief op haar Facebook-blad gedeel het. “Ek het dit gedoen omdat jy nie vir iemand hierdie brief kan skryf as jy hom wegwys nie.”

Die UK het in reaksie op die herrie toegegee dat die bewoording van die brief wat aan Michiel gestuur is “generies” is en inderdaad lui dat die “aansoek nie mededingend is nie”.

“Die fakulteit sal sy stelsel hersien om te kyk na bewoording wat op spesifieke aansoekers van toepassing is en nie generies is nie,” het die UK beloof nadat hy oor die bewoording van die brief gekap is.

Nadat iemand anders egter die plasing gedeel en dit soos ʼn veldbrand versprei het, het Kühn haar oorspronklike plasing verwyder.

Die gesin is sedertdien van rassisme en sogenaamde wit bevoorregting beskuldig en Michiel word openlik geteiken. Sy uitstekende punte word selfs bevraagteken.

“Hy het sedert verlede jaar 12 uur per dag gesit en werk,” sê Kühn – en nou word Michiel, geensins deur sy eie toedoen nie, uit talle oorde verguis.

“Dit is ʼn situasie wat heeltemal buite sy beheer is.

“Ek is kwaad vir die Universiteit van Kaapstad. Alles wat nou gebeur, het uit daardie brief van die universiteit gevloei.”

Michiel het intussen reeds met sy studie aan die US begin, ʼn besluit wat hy geneem het selfs voordat die herrie oor die UK-plasing losgebars het. “Ons is bly en dankbaar vir die geleentheid,” het Kühn gesê.