Gesin in winkel ‘verneder’ oor kinders se slaapklere

Die slaapklere wat die dogters gedra het. Foto: Audrey Swart via Facebook.

Die slaapklere wat die dogters gedra het. Foto: Audrey Swart via Facebook.

ʼn Ma van Glenharvie het haar na sosiale media gewend om haar misnoeë uit te spreek teen Pick n Pay in Westonaria, wat haar en haar twee dogtertjies glo nie wou toelaat om hul inkopies te voltooi nie, omdat die kinders slaapklere aangehad het.

Audrey Swart het aan Maroela Media gesê haar twee dogtertjies, onderskeidelik agt en 11 jaar oud, het Woensdagaand vroeër as gewoonlik hul slaapklere aangetrek. “Die weer was baie swaar en ons het vir die dogtertjies gesê om sommer lekker vroeg te bad. Ons is toe net vinnig Pick n Pay toe vir brood en melk.”

Volgens Swart is sy, haar man en hul kinders omstreeks 19:20 saam na die winkel toe. “Ons het klaar broodrolletjies gekry en ek was op pad na die suiwelafdeling toe ʼn vrou van Pick n Pay na ons toe aangestap kom. Sy het net gesê ‘good evening’ en ʼn papier onder ons neuse gehou. Ek moes self lees wat daarop geskryf staan.”

Swart het gesê die nota het aangedui dat kinders blykbaar nie in die winkel mag wees met slaapklere aan nie. “Ek het toe maar die kinders gevat en begin uitloop. My dogtertjies was bang en skaam. Hulle het nie geweet hoekom kyk almal nou vir ons nie. Die manier wat sy dit gedoen het, het ons regtig soos skurke laat voel,” het sy gesê.

“Die dogters was saam met ons die winkel in omdat hulle baie bang is vir die swaar weer en weerlig. Dit is seker die tweede keer in hulle lewe wat ons hulle toelaat om met hulle slaapklere winkel toe te gaan.”

Swart het na die voorval ʼn inskrywing op die Krugersdorp Community Forum Facebook-blad geplaas om ander mense te waarsku oor die Pick n Pay se reël. “Ek wil regtig nie baklei of iets nie. Ek het my man nog nooit so kwaad of ongelukkig oor iets gesien nie. Ek het amper nie gisteraand geslaap nie omdat ek weet my dogtertjies voel nog steeds sleg. My oudste kan al verstaan en het gevra hoekom sy nie haar slaapklere mag aanhê nie.”

Swart beweer nadat hulle die winkel verlaat het, het ʼn seuntjie, van ongeveer drie jaar oud, die winkel ingekom met nagklere aan. “Ek kan nie met sekerheid sê of hulle daardie gesin ook gevra het om te loop nie,” het sy gesê. Swart het aanvanklik gesê haar man sou vandag die bestuurder van die winkel oor die aangeleentheid gaan spreek, maar het later gesê sy is nie seker of hy nog beplan om dit te doen nie.

Dan Booysen, die bestuurder van die Pick n Pay in Westonaria, het by navraag aan Maroela Media gesê ʼn plakkaat is wel op die deur geplak wat aandui kinders mag nie met slaapklere aan in die winkel wees nie.

Swart beweer hulle het nie die plakkaat gesien het nie, anders sou hulle nie ingegaan het nie. Swart het ook gesê Booysen “was nog altyd vriendelik” en dit dra juis daartoe by dat die hele ervaring vir hulle so sleg was.

Volgens Booysen pas baie winkels in die omtrek dieselfde reël toe. Hy het gesê hy is bewus van Swart se Facebook-inskrywing en het intussen na beeldmateriaal van die voorval gekyk. Hy het gesê die seuntjie, wat na bewering na die Swart-gesin die winkel in sy japon binnegekom het, kan nie op die beeldmateriaal gesien word nie. Hy het wel op die beeldmateriaal gesien hoe die vrou die nota vir die Swart-gesin neem.

Booysen het aan Maroela Media gesê hy het die Krugersdorp Community Forum Facebook-blad verlaat, omdat hy nie moddergooiery wil betrokke raak nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

218 Kommentare

jongste oudste gewildste
Bennie

Belaglik verby Pick en Pay gaan julle nou alle klante se kleredrag bekyk en stop as hulle onvanpas aangetrek is in julle boeke ?

Corrie

So wat sou die rede wees vir die reël? En geld dit vir die moderne tendens om met pantoffels winkel toe te gaan.

henda

Belaglik ek kan nie glo daar is so n reel nie! Mense gee dan nie eers meer om of hulle ordentlik geklee na n winkel toe gaan nie maar nou wil hulle n bohaai maak oor kinders met slaapklere.

Lollie

Goeie genugtig dis darem verskriklik dat n mens nie sommer net na n winkel in n haas kan gaan nie. Hulle is eder bereid om klante te verloor. Dis ridiculous!!

marlene

Dit is nou absoluut belaglik! Hulle gaan beslis nie budget maak op hierdie manier nie!
Klomp nonsens –