Gesondheidswerkers uiters bekommerd oor NGV

Argieffoto (Foto: DarkoStojanovic, Pixabay)

Solidariteit het Woensdag sy verslag oor gesondheidswerkers in Suid-Afrika se kennis van, insig in en opinie oor die voorgestelde Nasionale Gesondheidsversekering (NGV) bekend gemaak.

Die verslag bevat navorsing wat vandeesmaand as opvolgondersoek deur die Solidariteit Navorsingsinstituut (SNI) gedoen is. Die eerste studie is in Julie verlede jaar gedoen om vas te stel wat gesondheidswerkers se opinie en kennis van die NGV is en wat hul vermoë sal wees om die NGV te akkommodeer.

“Waar die 2018-studie slegs Solidariteit-lede ingesluit het, is vraelyste vanjaar aan gesondheidspraktisyns in die private sowel as die openbare sektor reg oor Suid-Afrika gestuur,” het Nicolien Welthagen, ʼn navorsingsielkundige verbonde aan die SNI, gesê.

Luidens die verslag is gesondheidspraktisyns geweldig bekommerd oor die voorgestelde gesondheidsversekering.

Volgens Welthagen dui die bevindinge op wantroue jeens die regering oor die wyse waarop hy die NGV in werking wil stel en bestuur.

“Soveel as 80% van die respondente is negatief of skepties oor die NGV. Volgens die resultate van hierdie verslag glo die respondente nie dat die NGV die gesondheidsorgstelsel en dienslewering sal kan verbeter nie. Slegs 15% van die respondente is van mening dat die NGV suksesvol geïmplementeer kan word en 84,5% glo dat die NGV die potensiaal het om die gesondheidsorgstelsel in Suid-Afrika te destabiliseer en die kwaliteit en hoë gehalte diens wat reeds deur die private sektor gelewer word, kan benadeel.”

Die verslag dui verder op die geweldige risiko wat emigrasie van praktisyns vir die toekoms van Suid-Afrika se gesondheidsorgstelsel inhou. “Daar heers groot kommer oor ʼn tekort aan gesondheidsorgwerkers, veral gesien in die lig daarvan dat 20,8% van die respondente aandui dat hulle reeds stappe gedoen het om te emigreer en ʼn verdere 41,6% dit sal oorweeg om te emigreer sou die NGV geïmplementeer word,” het Welthagen gesê.

Solidariteit maan die regering om erns te maak met terugvoer vanuit die bedryf omdat dit juis dié praktisyns is die meeste geraak gaan word.

“Sommige kommentare en voorstelle word gerieflikheidshalwe geïgnoreer sodat die ideologies gedrewe planne polities gestoomroller kan word. Hierdie verslag toon onomwonde dat daar vanuit die bedryf ʼn boodskap gestuur word dat die NGV nie kan werk nie en dat praktisyns nie daarin belangstel om deel te neem aan ʼn totaal gesentraliseerde, staatsbeheerde gesondheidstelsel nie,” het Welthagen gesê.

“In ʼn reeds sukkelende gesondheidsorgstelsel en wankelende ekonomie word daar onverantwoordelik en ondeurdag met die beplanning van die NGV omgegaan. Dit is moeilik, gegewe die terugvoer wat die regering ontvang, om enigsins te sien hoe die regering die gesondheid van die publiek of die welstand van praktisyns as prioriteit beskou.”

Morne Malan, ʼn senior navorser verbonde aan die SNI, sê alle formele prosesse word ondersoek waardeur die wetsontwerp beveg kan word.

Solidariteit het ook reeds sy regspan beveel om die grondwetlikheid van die huidige formaat in die hof te toets, sou dit nie na wense gewysig word nie.

“Ons bestudeer en is nou al vir bykans drie jaar betrokke by die NGV. Ons is goed ingegrawe en sien verskeie grondwetlike, praktiese en ekonomiese tekortkominge wat geweldig negatief sal wees vir Suid-Afrika as geheel. Derhalwe staan ons reg om, indien nodig, selfs in die Konstitusionele Hof daarteen te baklei.”

Die burgerregtegroep AfriForum het Dinsdag boonop sy misnoeë te kenne gegee met die verloop van die openbare verhore oor die NGV. Die organisasie sê hy gaan ook regsadvies inwin oor beweerde prosedurele onbillikheid van die proses tot dusver.

Die verhore is ʼn openbare deelnameproses waar Suid-Afrikaners hul insette oor die voorgestelde plan kan lewer.

Natasha Venter, AfriForum se woordvoerder vir NGV, het gesê dit blyk dat die proses gemanipuleer word om ’n uitkoms te kry wat die implementering van NGV gaan bevorder.