Argieffoto: https://pixabay.com
Die polisie ondersoek ʼn beweerde sameswering tussen die eienaar van ʼn skrootwerf in Soweto, suid van Johannesburg, en ʼn motordiefstalsindikaat wat voertuie oor verskillende dele van Gauteng steel.
Kol. Lungelo Dlamini, woordvoerder van die polisie, het in ʼn verklaring gesê drie verdagtes is Dinsdag by dié skrootwerf in hegtenis geneem toe die polisie op motoronderdele van onder meer Toyota Hilux, Izuzu en Hyundai-bakkies afgekom het.
Volgens Dlamini behoort dié onderdele aan voertuie wat onlangs in Primrose, Diepsloot, Sophiatown en Honeydew in Johannesburg gesteel is.
ʼn Mazda Drifter wat in Februarie vanjaar in Bethlehem in die Vrystaat as gesteel aangemeld is, is ook op die skrootwerf gevind.
Volgens Dlamini poog die ondersoekspan tans om die oorsprong van die gesteelde voertuie op te spoor sodat die sindikaat moontlik geïdentifiseer kan word. Die ondersoekspan sal ook op nog skrootwerwe toeslaan wat sedertdien as verdag geïdentifiseer is.
Die drie verdagtes sal na verwagting Donderdag in die Protea-landdroshof in Soweto verskyn op aanklagte van motordiefstal en die diefstal van motoronderdele.
Gaan City Deep toe. Daar gaan rowwe dinge aan
Snaaks hoe vinnig goed gebeur 3 weke voor die verkiesing. Wonder maar net. Daai skrootwerf operate al jare!