Die polisie in Limpopo het Saterdagaand beslag gelê op ʼn gesteelde vuurwapen en twee handgranate, nadat hulle ʼn man net buite Dullstroom in Mpumalanga in hegtenis geneem het.
Wetstoepassers het Saterdagaand ʼn padblokkade op die Loskop-Ntwane-pad langs die Moutse-landdroshof gehou en omstreeks 21:00 die 28-jarige verdagte in ʼn wit Volkswagen Polo van die pad afgetrek.
Die voertuig is deursoek en die polisie het ʼn gesteelde vuurwapen, 43 rondtes 9 mm-ammunisie en twee handgranate gevind. Die vuurwapen is glo uit die Dullstroom-polisiestasie gesteel. Die polisie het ook beslag gelê op handboeie, ʼn weerkaatsende baadjie en ʼn koeëlvastebaadjie wat deur die polisie gebruik word.
Volgens brig. Motlafela Mojapelo het die verdagte, wat volgens die polisie gevaarlik is, hom aanvanklik teëgesit toe die polisie hom in hegtenis wou neem. Sy profiel sal nou nagegaan word om te bepaal of hy met ander ernstige misdade in die gebied verbind kan word.
Volgens Mojapelo word hy deur klagtes van diefstal van ʼn polisie vuurwapen, onwettige besit van ʼn vuurwapen en ammunisie, en die nabootsing van ʼn polisiebeampte in die gesig gestaar.
Die verdagte sal binnekort in die Moutse-landdroshof verskyn.