ʼn Groep mans wat glo beplan het om ʼn gewapende roof uit te voer, is Dinsdag by ʼn vulstasie in KwaMashu in KwaZulu-Natal voorgekeer en in hegtenis geneem.
“Die drie verdagtes het met ʼn wit Toyota Yaris gery en hulle was nog besig om verkenningswerk by die vulstasie te doen toe die polisie op hulle toegeslaan het,” het kol. Jay Naicker, woordvoerder van die polisie, gesê.
Naicker sê die KwaZulu-Natalse spoorspan, provinsiale misdaadintelligensie, spesiale taakmag en die Valke was almal by die inhegtenisneming betrokke.
“Die verdagtes, almal tussen 29 en 37 jaar oud, is na Greenwoodpark-polisiestasie geneem,” het Naicker bygevoeg. “Uit ʼn voorlopige ondersoek het dit aan die lig gekom dat een van die verdagtes reeds uit is op parool in verband met ʼn skuldigbevinding ná ʼn gewapende roof waarvoor hy 24 jaar tronkstraf opgelê is. Hy het agt jaar tronkstraf uitgedien.”
Die drie verdagtes sal binnekort in die hof verskyn.