Foto’s: Gewelddadige betogings ruk Vaalwater

Geweldadige betogings in Vaalwater, Limpopo. (Foto: Justin Steyn)

Deur Justin Steyn

Die gemeenskap van Vaalwater in Limpopo is Dinsdag aangesê om liefs tuis te bly weens gewelddadige onluste en onwettige stakings op dié dorp waar ʼn sterk polisieteenwoordigheid sedert Maandag heers.

Talle stakende inwoners van die informele nedersetting buite die dorp het Maandag in die vroeë oggendure begin om voetgangers, voertuie en winkels met klippe te bestook. Betogers is ontevrede oor swak dienslewering deur die plaaslike munisipaliteit, asook oor ʼn kontrak wat die padagentskap Sanral met die munisipaliteit aangegaan het.

Die gemeenskap het glo reeds op 22 April ʼn memorandum met hul griewe aan die munisipaliteit oorhandig, maar meen dat niks klaarblyklik nog gedoen is om aandag te gee aan dié griewe nie.

Betogings het Dinsdag voortgegaan toe motorbande aan die brand gesteek en infrastruktuur soos stoptekens beskadig is. Minstens een persoon is tydens dié voorval aangeval en beroof en strate na en van die dorp is afgesper.

Plaaslike veiligheidsgroepe is ook tydens die optog ontbied om sakepersele teen plunderaars te beskerm, nadat verskeie ondernemings Maandag reeds skade gely het. Die polisie het ook Dinsdag betogers met traangas en rubberkoeëls uiteengejaag. Teen Woensdagoggend was die situasie op die dorp kalm.

Marlene van Staden, burgemeester van Modimolle-Mookgopong waaronder Vaalwater val, het  Dinsdag in ʼn verklaring gesê dat sy weens veiligheidsredes nie die skare Dinsdag kon toespreek nie.

“Ek het vandag (Dinsdag) ʼn poging aangewend om met verteenwoordigers van die gemeenskap te vergader, maar as gevolg van kommer oor veiligheid kon dit nie gebeur nie. Ek is steeds bereid om te vergader om probleme te bespreek, maar ek kan geen geweld en vandalisme goedpraat nie,” het sy in die verklaring gesê.

Volgens Van Staden is stakers ontevrede oor ʼn kontrak wat die munisipaliteit met Sanral aangegaan het om die R33-snelweg buite die dorp op te gradeer.

Betogers is vies omdat Sanral nie van plaaslike werkers gebruik maak nie.

Van Staden het gesê dit is die derde keer dat ʼn onwettige staking in die gebied oor die betrokke kontrak plaasvind.

Joe da Silva, ʼn plaaslike sakeman, het Dinsdag aan Maroela Media gesê dat hy ʼn groot verlies gely het tydens die vorige dag se geweld.

“Die betogers het van my trollies en ander goedere gesteel om die pad mee af te sper. Daar is ook ʼn groot aantal goedere soos kruideniersware gesteel. Ek het vandag besluit om liefs agter toe deure sake te doen om verdere skade te voorkom,” het hy gesê.