Drie gewapende mans het Woensdagoggend op ʼn gewilde restaurant in Durban toegeslaan en dit van ʼn onbekende hoeveelheid kontant beroof.
Kyle van Reenen, woordvoerder van Marshall Security, het gesê die oggendbestuurder is deur drie mans genader wat voorgegee het hulle soek werk, toe hy die restaurant vir die dag oopgemaak het. Die restaurant is in ʼn winkelsentrum in Kensingtonweg in Durban-Noord geleë.
“Een van die verdagtes het na bewering die bestuurder met ʼn mes aangehou, terwyl ʼn ander verdagte, wat met ʼn vuurwapen gewapen was, aangedring het op geld en sy selfoon,” het Van Reenen gesê. Die verdagtes het die bestuurder glo met die kolf van die vuurwapen aangerand en te voet gevlug.
“Hulle het na bewering met ʼn groot hoeveelheid geld, ʼn selfoon en skootrekenaar weggekom.”
Veiligheidswagte van Marshall Security en polisiebeamptes van die Durban-Noord-polisiestasie was kort nadat die rooftog aangemeld is, op die toneel. Die verdagtes kon egter nie opgespoor word nie en is steeds soek.
Die polisie ondersoek die voorval.
Ek was al self die slagoffer van twee gewapende rooftogte en dit is nie speletjies nie, glo my! Soos in hierdie geval, geskied dit met oooopmaak- of sluitingstyd. Ek wil net mense waarsku om uiters versigtig te wees en nie aktetasse by hulle te dra nie. Hou die minimum by jou asseblief en moenie weerstand bied nie. Dooie “helde” kan nie praat nie!
3 mense of enige getal van meer as 1 wat gelyktydig werk soek spel gevaar.
Welkom in die RSA, ons eie rampokkerland.