Ghoema-nominasie onttrek oor Steve Hofmeyr

Bobby, Bok, Steve, Jay en Ruhan. (Foto: Verskaf)

MultiChoice het versoek dat die musiekvideo van “Die Land” van die benoemingslys van kykNET se Ghoema-musiektoekennings verwyder word as gevolg van Steve Hofmeyr se betrokkenheid daarby.

Die lied word deur Hofmeyr, Bok van Blerk, Bobby van Jaarsveld, Jay en Ruhan du Toit gesing. MultiChoice het gedreig om sy borgskap van dié geleentheid te beëindig indien dit nie gebeur nie.

Die organiseerders van die Ghoema-musiektoekennings, die Ghoema Musiek Trust, is versoek om die “Die Land”, wat vir beste musiekvideo benoem is, van die benoemingslys af te haal.

In ʼn brief vanaf die Ghoema Trust het die hoof‑ uitvoerende beampte van die Ghoemas, Heidi Edeling, die nuus aan die bestuurspan meegedeel.

“Ek het ’n amptelike versoekbrief van Joe Heshu, MultiChoice se groepshoof vir korporatiewe bestuur, op 25 Maart hierdie jaar ontvang.

“As gevolg van Steve Hofmeyr se deelname aan die video, versoek MultiChoice dat die benoeming van ‘Die Land’ onttrek word. Verder verklaar hulle dat indien dit nie plaasvind nie, hulle geen opsie het as om hul borgskap van die Ghoema-musiektoekeninngs 2019 te onttrek nie.”

Edeling het verder gesê dat daar by wyse van ʼn demokratiese stemproses besluit is dat “Die Land” se musiekvideo van die benoemings onttrek word.

Steve Hofmeyr (Foto: Janie Monsieur/Maroela Media)

Arnold Coleske van Coleske Artists het op Edeling se versoek gereageer. Hofmeyr het op sy Facebook-blad geskryf dat Coleske namens vele kunstenaars gepraat het in sy reaksie.

“Ons is diep hartseer om jou e-pos te ontvang om ons in te lig dat die video vir ‘Die Land’ onttrek is van die Ghoemas. Dít raak nie net die betrokke kunstenaars, komponiste van die liedjie en regisseur van die video nie, maar dit raak elke ander kunstenaar wat toekennings ontvang, omdat ons glo dat hierdie besluit die integriteit van die toekennings in gedrang bring,” het Coleske geskryf.

“Ons moet ons uiterste teleurstelling uitspreek oor Ghoema Musiek Trust, wat in direkte teenstelling is met wat in die offisiële kriteria, reëls en regulasies gestipuleer word.

“Hierdie is ʼn klap in die gesig van kunste, vryheid van uitdrukking én vir die bevordering van Afrikaans.”

Arnold Coleske. (Foto: Afrikaans is Groot/Facebook)

Coleske het verder van die regulasies van die Ghoemas aangehaal.

“1.1 Die kykNET Ghoema Musiektoekennings (hierna genoem Die Ghoemas) is ’n amptelike onafhanklike toekenningsgeleentheid waar kunstenaars, musiekgroepe, musikante, vervaardigers en liedjieskrywers van die Afrikaanse musiekbedryf vir sekere prestasies oor ’n spesifieke periode vereer word.

“1.2 Die Ghoemas funksioneer sonder enige eksklusiewe naamregte en/of besluitneming deur die nasionale pers & media, of enige platemaatskappy. Platemaatskappye en die pers & media staan in vennootskap om die musiektoekennings te bemark, uit te voer en blootstelling te verleen binne ’n ooreenkomsraamwerk met elk.”

Coleske het gesê hulle glo die inskrywing van “Die Land” en die daaropvolgende benoeming vir beste musiekvideo is bevestiging dat die inskrywing binne die reël van die Ghoemas val.

Edeling het alle verdere navrae na kykNET verwys. ʼn Woordvoerder van kykNET het egter navrae na Joe Heshu van MultiChoice verwys.

Maroela Media het navrae aan Heshu gerig en wag op terugvoer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

214 Kommentare

jongste oudste gewildste
Johan

Dié ruggraatloosheid skree ten hemele….

EK LIEF MY AFRIKAANSE MUSIEK!!

……Nou niks leliks bedoel nie……Jy kan teerpaaie en bande aan die brand steek en alles om jou vernietig daar word niks aan gedoen nie.Maar Steve Hofmeyr se liedtjie word onttrek….by die Ghoema’s so unfair!!!!

Anonieme Lafaard

The plot thickens …

Pieter

Die finale aanslag om blanke aftikaans sprekendes te marginaliseer en as twee klas burgers te kry.

Schalk

Is dit nie dalk maar net weer die bewys dat daar politiek in musiek , sport en elke dag se lewe is en deur rassistiese gesante afgedwing word nie? Waar is die integriteit en samestelling van die komitee wat so besluit kan regverdig?