Goedkoopste pakket met kykNET nou amper dubbel die prys

(Argieffoto: kykNET)

Talle kykNET-kykers is die josie in omdat die prys van die goedkoopste DStv-pakket waarop dié Afrikaanse kanaal voortaan beskikbaar gaan wees, bykans verdubbel.

DStv doen ná 29 Oktober weg met sy Select-pakkette. Dit het toegang tot kykNET ingesluit en het intekenare R265 per maand gekos.

Die Compact Plus-pakket sal voortaan die goedkoopste opsie vir kykNET-kykers wees, maar die prys daarvan is op R519 per maand – héélwat meer as wat intekenare vantevore betaal het.

Compact Plus is die tweede duurste opsie vir intekenare, met net die Premium-pakket wat kykers meer uit die sak jaag. kykNET is nét op dié twee platforms beskikbaar.

“DStv hersien deurlopend sy inhoud, pakketstruktuur en pryse om te verseker dat klante vir goeie waarde toegang het tot die beste en nuutste inhoud. Gevolglik skort ons sommige pakkette op en word klante na die hoofpakkette verwys waar dieselfde programme en kanale gevind kan word,” het Benedict Maaga, woordvoerder van DStv, gesê.

Maaga het gesê voormalige Select-intekenare word outomaties na die Family-pakket gemigreer. Intekening beloop steeds R265 per maand. Op dié pakket het intekenare toegang tot kykNET & kie en kykNET NOU (maar nie tot kykNET nie).

Volgens hom is kykNET ʼn “premie-kanaal” en daarom gaan dit voortaan net op die Premium- en Compact Plus-pakkette beskikbaar wees.

ʼn Intekenaar het aan Maroela Media gesê sy het op verskeie platforms gepleit dat die prys van ʼn intekening op ʼn pakket wat kykNET insluit, heroorweeg word. Sy het selfs by DStv se bedryfshoof, Brand de Villiers, probeer uitkom in ʼn poging om haar saak aan hom te stel. De Villiers is in Doebai gesetel.

Nóg ʼn kyker het aan Maroela Media gesê hy glo die besluit gaan duisende Afrikaanse kykers negatief raak. kykNET het navrae na DStv verwys.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

115 Kommentare

jongste oudste gewildste
CJ

Waar is Afriform nou.
Dit is net nog n aanslag op die Afrikaanse gemeenskap.

Willem du Toit

Seker ‘n poging om minder Afrikaanse sprekende kykergetale minder te kry en dan word daar oorweeg om kyknet heeltemal te skraap. Afrikaans is ‘n indringer taal.

Oinkie

Ek verstaan nie hoekom o s nog DSTV ondersteun nie. Hulle weet ons Afrikaanse manne sal betaal vir hul rugby. Raai wat, dis net op Premium pakket beskikbaar. Sokker is op die goedkoopste intree pakket beskikbaar. Wanneer gaan ons volk wakker skrik???

Blikke

Nou is ek eers bly myne afgesit met die Hofmeyr boikot…..hulle moet nou begin opmaak vir verliese as gevolg hiervan. Nee wat hou maar julle DSTV ek kom heel goed daarsonder klaar!

Marinda

DStv kan maak soos hulle smaak. Lankal mors ek nie my geld op hulle nie. Beter om sonder TV en DStv te wees.