Goeie nuus: Bothaville-gemeenskap fnuik plaasaanvallers

Van die boere wat deel was van die optrede. Foto's: Facebook

Van die boere wat deel was van die optrede. Foto: Facebook

Etlike minute nadat ʼn groep gewapende rowers Sondag ʼn egpaar op hul plaas naby Bothaville in die Vrystaat aangeval en beroof het, het hulle hul rieme styfgeloop toe meer as 100 boere van die omgewing en die polisie tot die egpaar se redding gekom het.

“Dié suksesverhaal kan grootliks toegeskryf word aan ʼn goeie kommunikasiestelsel en vinnige optrede en samewerking van die gemeenskap en owerhede,” het Johan du Plessis, Bothaville se landelike veiligheidskoördineerder, Maandag aan Maroela Media gesê.

Dit volg nadat ses aanvallers Sondag in hegtenis geneem is kort nadat hulle Gert (65) en Lulu (60) Malan van die plaas Kromvlei omtrent 13:00, ná kerk, by hul plaashuis oorval, met draad vasgebind en beroof het. Die aanvallers het vuurwapens, geld en juwele uit die kluis gesteel, voordat hulle met die egpaar se Ford Bantam-bakkie probeer vlug het.

Een van die verdagtes wat aangekeer is.

Een van die verdagtes wat aangekeer is.

Lulu kon daarin slaag om los te kom en het hulp ontbied, waarna die plaaswag se beheerkamer die veiligheidsplan geaktiveer het. Deel van dié plan is om noodgevalle oor die gebied se radiostelsel uit te saai, en om waarskuwings op die gemeenskap se Whatsapp-groep te deel.

“Die gemeenskap het dadelik opgetree kort nadat die aanval plaasgevind het. ʼn Boer, wat vermoedelik die Whatsapp-boodskap gesien het, was nog op pad na die toneel toe hulle die egpaar se bakkie waargeneem en voorgekeer het. Die verdagtes het uit die bakkie gespring en in die sonneblomlandery ingehardloop.”

Intussen is die omgewing afgesper terwyl die net al nouer om die verdagtes gespan het. Boere en verskeie polisie-eenhede, waaronder die taktiese reaksie-eenheid, honde-eenheid, spoorsnyers en ’n polisie-helikopter, het hul kragte saamgesnoer.

Die eerste drie verdagtes is binne ʼn uur ná die aanval aangekeer. “Twee verdagtes het hul klere uitgetrek om onder die grond weg te kruip. Net hulle gesigte het uitgesteek. Hulle is vasgetrek met die hulp van drie lugspuite waarop boere gestaan het om die landery te fynkam.” Die laaste verdagte is teen 16:00 vasgetrek.

Twee van die verdagtes wat in hegtenis geneem is.

Twee van die verdagtes wat in hegtenis geneem is.

Al ses verdagtes is aangekeer sonder dat ’n enkele skoot afgevuur is.

Die polisie het beslag gelê op vyf vuurwapens, waaronder die wapens wat die rowers in die aanval gebruik het. Daar is ook op die gesteelde goedere beslag gelê.

Die verdagtes, Zimbabwiërs tussen 19 en 34 jaar oud, sal binnekort in die Bothaville-landdroshof verskyn op aanklag van huisroof en poging tot verkragting. Twee van die verdagtes woon in die Bothaville-area.

Die Malan-egpaar het gelukkig nie ernstige beserings tydens die aanval opgedoen nie, maar is erg getraumatiseer.

“Ons glo die optrede gaan die regte boodskap aan plaasaanvallers stuur. Hulle sal nie met hul gruweldade wegkom nie, want ons ʼn gemeenskap wat saamstaan en dadelik in ons massas optree,” het Du Plessis bygevoeg.

Lees die opvolgberig hier: Ses gevonnis jaar ná Bothaville-boere hulle vastrek

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

28 Kommentare

jongste oudste gewildste
pop

Eks baie bly dat die gemeenskap saamstaan. Maar nog steeds het die aanval reeds gebeur, en die 2 mense kon dood gewees het. Mense hoekom kry die gemors toegang tot julle wonings???Hulle sal net nou dubbel seker maak niemand kan alarm maak nie.

anet

Baie dankie aan die boere wat so vinnig gereageer het, en dat die Malan-egpaar die aanval oorleef het.
Ek is baie trots dat die Gemeenskap so uitreik na hulle medemens en die boere op die plase vir ons veilighou. Ek vertrou dat die Malan-egpaar berading sal ontvang na hulle erge traumatiese ondervinding.Die beskuldiges se gesigte moet aan almal gewys word, moontlik kan hulle erken word in verband met ander misdade.

Hulle hoort nie in ons land nie. Mr Zuma het die deure vir hulle oopgegooi en hulle ingenooi.

Tammy

Mooi so aan die boere van Bothaville, julle is almal helde!!!!!!Die ongelooflike spanwerk, sonder vrees is presies wat ons nodig het teen die misdadigers. Puik kommunikasie , baie baie dankie aan almal wat betrokke was by die aksie.

scalla

Knap gedaan boere, dink hul kan maak wat hulle wil in hierdie wettelose land.

anita

In die eerste plek, waar kry al die misdadigers wapens! En ja zuma sal die grense oopstel, vir ander lande, sodat hulle die vuil werk kom doen.dan lyk lyk suid afrika mos nie te skuldig aan roof, moord, verkragtings nie!,,,,