Goeie nuus: Groot katte kry opgeknapte ‘stoepe’ en swembaddens

Besoekers sal nou die bewegings van die groot katte in Nasionale Dieretuin in Pretoria op grootskerm kan dophou. Carol Thobela-Mabaso (regs) en Tracey Rehse, personeel van die dieretuin, verduidelik hoe die nuwe kamerastelsel werk. Foto’s: Esté Meyer Jansen.

Besoekers sal binnekort nie meer ʼn verskoning hê om nie die Nasionale Dieretuin in Pretoria se groot katte te kan sien nie.

Die leeus en tiers se opgeknapte kampe spog nou met ʼn beheerkamer met kameras wat hulle binne en buite monitor. Die beheerkamer is verbind met ’n grootskermtelevisie by die uitkykpunt oor die groot katte se kampe, wat beteken besoekers sal presies kan sien wat die diere aanvang, maak nie saak waar hulle hulle in die kampe bevind nie.

Volgens Craig Allenby, bemarkingsbestuurder van die dieretuin, is die drie tiers en ses leeus se kampe oor die laaste nege maande teen ʼn koste van R3 miljoen vir die groot katte se welsyn en personeel se veiligheid opgeknap.

Die groot katte het nou ʼn groter dagsorgfasiliteit wat beteken die karnivore kan nou rustig op hul eie sonstoep sit en bak terwyl hul kamp skoongemaak word. Daar is ook opgraderings aan hul nagsorgfasiliteit gedoen met ʼn nuwe deurkatrolstelsel, groter hekke wat dubbele slotte het en ʼn weegskaal in die leeus én tiers se hokke. Staalkoshouers is ook direk aan die deure gekoppel, wat dit makliker en veiliger maak om die diere te voer. Die tiers se swembaddens is vergroot vir meer plesier in die water. Verder is daar ook nuwe veiligheidsheinings geïnstalleer; die heinings en kamerastelsel werk met die nuutste sonkragtegnologie.

“Die diere se kampe moes opgegradeer word omdat die infrastruktuur net te oud geword het,” het Allenby gesê. Die groot katte se kampe is aanvanklik in 1929 gebou as deel van ʼn werkskeppingsprojek tydens die Groot Depressie. Dr. Rudolph Bigalke, die dieretuin se derde direkteur, het so vir 200 mense werk geskep, maar ook geskiedenis gemaak omdat dit toe die wêreld se grootste dieretuinkampe was en ʼn nuwe standaard gestel het vir hoe diere in dieretuine gehuisves is.

Winston (5), die dieretuin se wit Bengaalse tier, is Woensdag ná ʼn roetineondersoek in sy nuwe kamp vrygelaat. Daar is ook van sy semen versamel. Leia, ʼn tierwyfie, het eers ʼn sonarondersoek ondergaan omdat die dieretuinpersoneel gehoop het sy is dragtig. Die leeus sal in die volgende week na hul opgeknapte kampe geskuif word.