Goeie nuus: Tiener red hondjie by fietswedren

Rickus Grobler (Foto verskaf)

Rickus Grobler (Foto verskaf)

Rickus Grobler, ʼn gr. 11-seun aan die Hoërskool Menlopark in Pretoria, word geloof vir sy goedhartigheid ná hy ʼn rondloperhondjie by ʼn bergfietswedren gered het toe hy raakgery is.

Rickus het op 25 Julie aan die tweede been van die Spur-skole-bergfietswedren in Gauteng by Hoërskool FH Odendaal in Pretoria deelgeneem. Sy fiets se agterwiel is egter in die wedren beskadig en hy moes sy fiets verder stoot.

“Rickus het gesien hoe een van die fietsryers ʼn rondloperhondjie tref, en hy het die hondjie opgetel,” het Ina Grobler, Rickus se ma, aan Maroela Media gesê. “Die hondjie was baie vuil en het nie lekker geruik nie. Rickus het met die hond in een arm, terwyl hy sy fiets met die ander hand stoot, ongeveer 4 km na die wenstreep gestap.”

Isak Steyn en sy vrou, Ilka, van Villieria, het vroegoggend al die hond by die snoepie opgemerk. “Talle mense was lelik met hom, omdat hy sleg geruik en gelyk het,” het Ilka gesê. “Ons het terugbeweeg na ons staanplek, en die hondjie het ons gevolg en by ons kom lê. Dit was duidelik dat hy moeg en koud was, en net wou slaap. Ons harte was baie seer en ons het besluit om hom saam met ons huis toe te neem en die nodige sorg vir hom te gee.”

rickus grobler 3

Vélo (Ozzy) mooi skoongewas (Foto verskaf)

Deur die loop van die oggend, terwyl hulle aan die kinders se fietse gewerk het, het die hondjie verdwyn. “Ek en my man het tussen elke wegspring die hond gaan soek, maar kon hom nie kry nie. Ons het bly hoop dat iemand anders hom gekry en huis toe geneem het.

“Aan die einde van die dag, met die laaste wedren, sien ons hoe ʼn seun [Rickus] met die hond onder sy arm by die wenstreep aangestap kom,” het Ilka bygevoeg. “Ek en my man het na hom toe gehardloop om te hoor waar hy die hom gekry het. My hart was stukkend toe ek hoor hy is raakgery.”

Ilka en haar man het heel eerste vir die hondjie genoeg water en kos gegee. “Daarna het ons hom seker ses keer gewas om al die koeke en kakiebos uit te kry. Ons het hom vir tyd en wyl Vélo (Frans vir “fiets”) genoem.”

Hulle het die hondjie die Maandag na ʼn veearts geneem vir ʼn volledige ondersoek en om te bepaal of hy dalk ʼn mikroskyfie het. “Hy is behandel vir dehidrasie en bosluise en het ʼn ontwurmingsmiddel gekry.”

Die hond het wel ʼn mikroskyfie gehad en die veearts het die Dinsdagoggend die Dierebeskermingsvereniging gebel om te hoor aan wie hy behoort. “Hy het die eienaar se besonderhede vir ons gestuur en ons het met hom kontak gemaak. Vélo (sy naam is eintlik Ozzy) is Dinsdagaand terug na sy eienaar se huis,” het Ilka gesê.

Ilka en Isak het Rickus geloof vir sy optrede. “Ek het nie gedink mens kry nog sulke kinders nie. Ons is bly om te sien dat daar nog tienerseuns is wat omgee.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

19 Kommentare

jongste oudste gewildste
Tertia Myburgh

Dankie vir mense soos julle. :-)

HENNA

GOEIE NUUS … dankie vir oop harte !

EMK

Hulle moes hom sommer hou – die oorspronklike eienaar gee lyk my nie juis om vir sy hondjie as hy so vuil en verwaarloos was en dors en koud rondloop nie!!

rita

Rickus gaan dit nog ver bring in die lewe as hy bereid is om n vuil beseerde hondjie te help! Hy is n ster!

Sollie

Ja ‘n hond raak nie oornag so vuil, verwaarloos en stink nie. Wat is die regte eienaar se verskoning dat ys hond so lyk en “weg geraak” het?