‘Goeie opkoms’ by Pik se roudiens verwag

Wyle oudmin. Pik Botha.

ʼn Redelike opkoms word Dinsdagoggend by oudmin. Pik Botha se begrafnis in die noorde van Pretoria verwag.

Die gewese minister van buitelandse sake is Vrydagoggend 12 Oktober in ʼn hospitaal in Centurion in die ouderdom van 86 jaar oorlede. Hy en sy tweede vrou, Ina, het in die Wonderboom-omgewing van Pretoria gewoon.

Sy oudste seun, Roelof, sê net ʼn vriend van sy pa sal tydens die teraardebestelling 10:00 in die Heatherdale-begraafplaas iets oor die ontslape minister sê.

In die NG kerk Wonderpark in Berglaan, Akasia, waar die roudiens om 11:00 begin, sal Vic Zazeraj, op sy dag Botha se privaat sekretaris, en die politieke ekonoom Moeletsi Mbeki hulde aan hom bring.

“Ons het nie die roudiens geadverteer nie,” het Roelof Maandag gesê, “maar ons verwag redelik [baie] mense.” Onder hulle is Roelof se oudste seun en Botha se oudste kleinseun, ook Roelof, ʼn waagkapitalis, wat spesiaal uit Amerika kom om afskeid van sy oupa te neem.

Hy sê Botha se vrou vaar goed in die omstandighede omdat sy etlike weke gehad het om haar op die onvermydelike voor te berei toe dit duidelik begin word het haar man se einde is naby.

Roelof vertel intussen al het heelwat mans in die familie die name Roelof Frederik gekry, was daar net een Pik. “Toe hy klein was, so vier of vyf, het hy eenkeer ʼn doop bygewoon in ʼn wit hempie met ʼn manelpakkie wat te klein was vir hom. Iemand het gesê hy lyk soos ʼn pikkewyn en 80 jaar later was sy bynaam steeds Pik.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

17 Kommentare

jongste oudste gewildste
leser

“goeie opkoms” klink so al of dit na ‘n rugby wedstryd verwys word
weereens sterkte aan pik se familie, ‘n waardige man het heen gegaan

se maar net

ag ek laat weet maar net dat ek dit nie sal bywoon nie

BLOM

Ek sal ongelukkig ook nie daar wees nie.

Geheime.....

Hy vat verseker baie geheime saam hom graf toe! My man se oupa was n raadgewer vir die president daardie tyd en tot met sy dood het hy gese Suid Afrikaaners sal skrik om te weet wat ALLES daai tyd beplan was!

A

Daar sal seker baie ANC lede wees. Hy was mos lid van hulle gewees.