Gordhan-probleem laat Ramaphosa voor moeilike keuse

Pravin Gordhan. Foto: Thobile Mathonsi/ANA

Asof pres. Cyril Ramaphosa nie reeds genoeg probleme het nie, het die geval met Pravin Gordhan hom nou met ʼn reusagtige turksvy gekonfronteer om saam te val met die aankondiging van sy nuwe kabinet.

Gordhan word wyd beskou as een van Ramaphosa se bekwaamste, hardwerkendste en lojaalste ministers, en hy is een van die bloedweinig in die huidige kabinet wat internasionaal aansien geniet. Boonop het hy ʼn uiters belangrike taak, naamlik om die land se mislukkende staatsbestuurde openbare ondernemings weer funksionerend en op die wenpad te kry.

Maar hy het ʼn probleem wat maar nie wil weggaan nie en nou het die openbare beskermer, adv. Busisiwe Mkhwabane, ʼn bevinding daaroor teen hom gemaak wat Ramaphosa voor ʼn werklik moeilike keuse stel.

Ter sprake is ʼn besluit wat Gordhan jare gelede geneem het rakende die vroeë uittrede van Ivan Pillay as adjunkkommissaris van die Suid-Afrikaanse Inkomstediens – klaarblyklik om gesondheidsredes. Pillay het egter kort daarna as adviseur weer sy verskyning gemaak, teen ʼn inkomste aanvullend tot sy ruim pensioen.

Die openbare beskermer het bevind Gordhan het onregmatig opgetree. Gordhan stem nie saam nie en neem die kwessie nou op hersiening na die hooggeregshof, soos al meer mense doen as die openbare beskermer teen hulle ʼn bevinding maak.

Dit is ʼn ingewikkelde kwessie en dis dalk ten beste dat die hof die finale arbiter daaroor word, want daar is duidelik meningsverskil tussen die hoëprofiel regslui en politici wat hul menings oor die saak lug.

Die slaggat om te vermy is om betrokke te raak in ʼn stryery oor die persoonlikhede en motiewe van Gordhan en Mkhwebane en om deur die tersaaklike dokumentasie – nie die menings daaroor nie – te lees en tot ʼn eie gevolgtrekking te kom.

Doen ʼn mens dit, is die kanse goed dat jou gevolgtrekking kan wees dat hierdie ietwat van ʼn grys gebied is, en ten beste (uit Gordhan se oogpunt) ʼn uiters ongemaklike situasie wat maar net nie wil weggaan nie. Oor die omvang van die probleem sal die hof beskik, maar dis miskien nie Gordhan se beste uur nie.

Maar nou sit Ramaphosa met ʼn ander probleem, en dis baie pertinent uitgewys deur die EFF-leier, Julius Malema, toe hy gesê het as Ramaphosa nie vir Gordhan uitlaat uit sy kabinet nie, sal hy moeilik (eintlik nooit nie) enigiemand kan uitlaat wat deur die openbare beskermer skuldig bevind word en die saak op hersiening wil neem.

Daar is dus ʼn beginsel ter sprake, en Ramaphosa is ʼn man wat aanvoer hy wil op en uit beginsel ʼn skoon kabinet daar stel.

Dit is ʼn moeilike besluit waarvoor die president staan, maar niemand het ooit gesê dit gaan maklik wees nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

29 Kommentare

jongste oudste gewildste
Die Skim

Ramaphosa moet toe laat dat hy op n afstand beheer word nie – deur mense soos Malema wat soos George se weer verander nie

Marius

OB werk vir Zuma hoekom nou skielik???

sweis

Ons moet nie bekommerd wees oor sy kabinet nie ons moet meer bekommerd wees oor die feit dat hy nog niks gesê het oor sy diskriminerende wetgewing teen minderhede wat na 25 jaar lank agterstallig is

Dirk

“The new dawn of the ANC is a still born”! Evidence of treason is mounting against the Public Protector!

Spike

Die ob se bevinding is aangehits deur die zuptas, eff, blf. Gedoen net voor kabinet aankondiging. Hoekom is cyril bang vir hulle.