Gqeberha: Daar’s nog tyd om nuwe naam te stuit

Gqeberha (Port Elizabeth) in die Oos-Kaap. (Foto: Sharon Mugridge/Pixabay)

Die burgemeester van die Nelson Mandelabaai-metro in die Oos-Kaap het self sy teenkanting teen die voorgestelde naamsverandering van Port Elizabeth na Gqeberha te kenne gegee.

Nqaba Bhanga sê hy het aan die minister van kuns en kultuur, Nathi Mthethwa, geskryf om sy kommer met nie net die naamsveranderingsproses wat gevolg is te kenne te gee nie, maar ook oor die uitslag daarvan.

“Ek is van mening dat die nuwe name nie inklusief is nie en inderwaarheid geen isiXhosa-betekenis het nie,” sê Bhanga.

Die burgemeester sê hy betwis nie die behoefte aan plekname wat ʼn inklusiewe land weerspieël nie, maar glo nie die name het enige verband of verbintenis met die mense van die metro nie.

“Voorts is daar ʼn vraag oor betekenisvolle openbare deelname en die insette wat ontvang is. Ek is ingenome om te sien dat ander partye in Nelson Mandelabaai oor die kwessie met my saamstem.”

Nqaba Bhanga, burgemeester van die Nelson Mandelabaai-metroraad. (Foto: Facebook)

Bhanga sê ook hy sal verdere stappe oorweeg indien die onberade veranderings voortgaan.

Andile Nduna, woordvoerder van die departement van sport, ontspanning, kuns en kultuur in die Oos-Kaap, het intussen gesê daar is steeds tyd om kapsie te maak teen die nuwe naam.

Enige besware moet egter direk aan die minister gerig word, sê Nduna.

Volgens Nduna kan mense binne 30 dae ná die aankondiging oor die naamsverandering in die Staatskoerant nog beswaar daarteen aanteken.

Benewens die nuwe naam vir Port Elizabeth, heet King William’s Town voortaan Qonce, Maclear word Nqanqarhu en Berlin word Ntabozuko.

Die Port Elizabeth-lughawe se naam verander na die Hoofman Dawid Stuurman-lughawe en die Oos-Londen-lughawe verander na die Koning Phalo-lughawe.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

29 Kommentare

jongste oudste gewildste
Persheks Adri

Regering mors lekker ons geld op snert! Die land is op sy knieë, maar geld is daar vir die klomp om rond te gooi pffft magtag man dink vir ‘n slag of is dit moeilik?

ES

Niemand kan die naam uitspreek nie… ek dink dis verregaande.

annie

Die lughawens se name kan ook maar uitgelos word. Die minister het ‘n vreemde kop. Gaan hy nou dwarsoor die land sirkusse begin?

Keagga

Daar moet eeder gekyk word na werk en nie nog meer geld mors op naams veraderinge die land is reeds op sy kniee en dan word daar geld gemors om name te verander.
Ag nee man kom by

Mariana

Hoop die naamsverandering word gestuit. Als net geldmors en onnodig. Lughawens kan ook hul name behou. Niemand weet eers wie die twee is wat nou vernoem moet word nie. Die minister is vervelig en het ook nie idee van wat sy werk behels nie. Miskien moet hy bietjie gaan kyk na wat hy kan doen om die land se ekonomie te red……..bespaar, bespaar, bespaar