Groblersdal-seuns ‘te gou weggeruk’

JG Greyling, Conrad Meiring en Stiaan Grobler. (Foto: Verskaf)

“Saterdagaand het ’n storm oor die dorp uitgesak. Dít was vir my ʼn teken dat God geweet het hoe seer ons gemeenskap het en dat Hy saam met ons huil.”

Só sê Micaela Jovner (19), ʼn hegte vriendin van die drie matrikulante van die Hoërskool Ben Viljoen in Groblersdal, Limpopo, wat vroeg Saterdagoggend in ʼn motorongeluk in die Wes-Kaap gesterf het.

’n Kranslegging sal op 7 Desember vir die seuns by die skool gehou word.

Micaela, ʼn onderwysstudent aan Unisa wat vroeër saam met die seuns op skool was, sê dit is ʼn moeilike tyd vir die hele gemeenskap.

“Ons kan nou net staatmaak op die Here en almal se gebede om ons deur hierdie swaar tyd te dra.

Hulle was al drie engele wat te gou van ons gevat is.”

Stiaan Grobler en JG Greyling. (Foto: Verskaf / Micaela Jovner Photography)

Maroela Media het vroeër berig dat JG Greyling, Stiaan Grobler en Conrad Meiring (almal 18 jaar oud) met hul matriekvakansie in Hartenbos was toe die motor waarmee hulle gery het die pad verlaat het. Die ongeluk het op die N2 naby George plaasgevind en al drie seuns is op die toneel dood.

ʼn Vierde insittende, Adrian Myburg (18), het die ongeluk oorleef. Dit is nie duidelik wie die motor bestuur het of wat tot die ongeluk gelei het nie.

Micaela sê Stiaan was haar “beste maatjie”.

“Daar is bitter min mense vir wie ek só baie omgee soos wat ek vir hom doen. Hy was ’n karakter op sy eie, met sy eie wil in die lewe. Hy was ontsettend familievas en het hulle belange altyd eerste op die hart gedra. Hy was my skuiling. Die plek waar ek die veiligste gevoel het.”

Stiaan, wat ook vir sy skool se eerste rugbyspan uitgedraf het, het volgens sy sussie, Carmen Mouton, gehoop om na skool as ʼn bemarker te werk. Hy wou ook graag klubrugby oorsee gaan speel.

“Stiaan het altyd voluit gelewe met baie selfvertroue en respek,” het sy oor haar broer gesê.

JG was ʼn sonstraalkind, vertel Micaela.

“Ek het nog nooit vir JG nié sien glimlag nie. Hy het die grootste hart gehad en het altyd tyd gehad om te gesels.

“Hy’t almal bo homself geplaas en sou altyd die ekstra myl stap vir die mense vir wie hy lief was. Hy was ons braaimeester en ’n regte kuierleier. Hy was altyd dieselfde. Jy hoef nooit te gewonder het waar jy met hom staan nie.”

Conrad Meiring by sy matriekafskeid vroeër vanjaar. (Foto: Verskaf / Micaela Jovner Photography)

Volgens Jean-Marie Heyns, bemarker by die skool, was JG ook ’n kranige gholfspeler. Hy was ingesluit by Limpopo se gholfspan wat aan die interprovinsiale toernooi deelgeneem het.

Micaela sê Conrad was die stil, teruggetrokke een – altyd op sy plek.

“Ek het al meer as een keer sy gesin afgeneem en hier na die tweede foto vra hy, ‘is ons al klaar?’

“Hy was mal oor gholf. Ek sou hom gereeld op sy motorfiets sien verbyry met sy gholfstok agterop.”

Conrad het ook krieket vir die skool se eerste span gespeel.

Hy sou volgende jaar by die Universiteit van Pretoria studeer en by die private De Goede Hoop-koshuis in Pretoria aansluit, waar sy sussie, Carli, reeds ’n inwoner is.

Dié koshuis het hul meegevoel vir die gesin op Facebook uitgespreek.

“Soos Carli hierdie jaar deel was van die De Goede Hoop-familie, het ons saam met haar uitgesien dat haar boetie Conrad in 2022 by ons aansluit as ’n eerstejaar.

“Ons dra elkeen in gebed op in hierdie moeilike tyd, mag Jesus julle trane opvang en elkeen wat hierdeur geraak word vertroos. Dit is ons gebed dat die mooi herinneringe van Conrad, JG en Stiaan sal voortleef in julle harte,” lui die inskrywing.

Micaela Jovner en haar beste vriend, Stiaan Grobler. (Foto: Verskaf)

John Smith, hoof van die Hoërskool Ben Viljoen, het die seuns beskryf as “leerders vir wie avontuur deel van hul lewenswyse was”.

“Met ’n glimlag het hulle die lewe aangepak. Elkeen met sy eie toekomsdrome en ideale. Altyd goed gemanierd en op hulle plek, staatmakers op verskeie terreine.

“Ons harte gaan uit na hulle gesinne. Woorde skiet tekort, maar hierdie leerders sal voortleef in ons almal se harte.”