Grondbesetters steek gebou aan die brand met gesin binne

Argieffoto

Carrie Esterhuizen en haar twee jong kinders was Vrydagmiddag in ʼn koshuis by die Cremona-kaasfabriek in Tshepisong, wes van Johannesburg, toe ʼn groep ontstoke grondbesetters die gebou aan die brand gesteek het.

Carrie se man, Fredrick Esterhuizen, het aan GroundUp vertel dat hy ten tyde van dié voorval al sowat ʼn maand by die fabriek as veiligheidsbestuurder gewerk het. Carrie en haar kinders, onderskeidelik vier en elf jaar oud, was by die huis toe besetters, inwoners van die EbuMnandini- informele nedersetting in Tshepisong, die heining gebreek en die gebou aan die brand gesteek het. Die gesin het nie seergekry nie.

Die inwoners het voorheen probeer om grond langs die fabriek te beset, maar die Johannesburgse Metropolisie (JMPD) het nog dieselfde dag die strukture wat hulle opgerig het, verwyder.

Antonio Cremona, eienaar van die grond, het in April aansoek gedoen om ʼn uitsettingsbevel. Die saak is in die hooggeregshof in Johannesburg aangehoor en ʼn tydelike uitsettingsbevel wat tot September geldig is, is toegestaan.

“My vrou het gebel en al wat ek kon hoor, was ʼn histeriese gegil. Ek het dadelik huis toe gejaag,” het Fredrick gesê. “Ek kon daarin slaag om my vrou en kinders te gryp net voor een van die petrolbomme in die woonkamer ontplof het.”

Carrie het gesê sy kon die petrolbom ruik terwyl sy haar man gebel het. “Ek het probeer om nie daaraan te dink nie en net daarop gefokus om my kinders uit die huis te kry.”

Fredrick is daarna met sy gesin na die fabriek se kantoor. “Vanuit die kantoorvenster kon ek sien hoe my huis afbrand. Daar was nie tyd om enigiets saam met ons te vat nie; ons het alles verloor.”

Carol Cooke, persoonlike assistent by Cremona, het gesê die brand het onder meer die Esterhuizen-egpaar se identiteitsdokumente en die kinders se skooluniforms en -boeke vernietig. Die besetters het die gebou ingegaan om huisware te plunder.

Die besetters voer aan hulle moet die grond beset omdat hulle nie kan bekostig om meer huur te betaal nie, want hulle is werkloos. Hulle meen die grond staan al 23 jaar lank leeg en dit is ʼn veiligheidsrisiko omdat daar geen heining is nie en die gras lank is.

Cooke sê egter daar was altyd ʼn heining om die grond, maar “die heining is voortdurend afgeruk en gesteel”. Die grond is nie ontwikkel nie omdat dit tot 2015 in ʼn oorledene se boedel vasgebind was.

“Grondbesettings is onwettig, ongeag hoe jy daarna kyk. Om net te vat wat nie aan hulle behoort nie, maak hulle niks beter as die misdadigers oor wie hulle kla nie,” het Cooke gesê. “Om mense met stokke, vuurwapens, klippe, petrolbomme, grawe en pangas te dreig, is geensins beter as die misdaad wat hulle veroordeel nie.”

Kapt. Solomon Sibiya, woordvoerder van die polisie, het gesê ses mense is in hegtenis geneem op aanklagte van openbare geweld en brandstigting. Pogings om kommentaar by die grondbesetters te kry was nie suksesvol nie.

Bron: GroundUp (Oorspronklike berig deur Zoë Postman)

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

49 Kommentare

jongste oudste gewildste
MT

Poging tot moord moet ook bygevoeg word op daardie klagstaat!!!

Han

Ons bid dat God sal ingryp in hierdie voorkoms van geweld en verwoesting. Hierdie dade is barbaars! Dinge kan waaragtig nie so aangaan nie!

hendrik

As dit nie n oorlogsverklaring is nie dan weet ek nie wat is nie.

PLP

Beslis poging tot moord. Die regering moet nou sy hand begin wys en hierdie soort barbaarse optrede begin stopsit. Lewenslang vir al hierdie mense. Geen uitsondering nie

HPV

Malema, Cyril, anargie, genoeg gesê!