Grondmosie: AfriForum wil internasionale gemeenskap waarsku

Julius Malema tydens ‘n perskonferensie.

AfriForum het Woensdag aangedui die burgerregte-organisasie gaan ’n omvattende internasionale veldtog van stapel stuur om buitelandse beleggers en regerings wêreldwyd in te lig dat eiendomsreg in Suid-Afrika bedreig word en dat buitelandse beleggings in Suid-Afrika ook nie veilig sal wees nie, sou planne vir die onteiening van eiendom sonder vergoeding deurgevoer word.

AfriForum se veldtog volg in reaksie op Dinsdag se goedkeuring van ’n mosie in die parlement wat ’n proses van stapel gestuur het om die Suid-Afrikaanse Grondwet te wysig om onteiening sonder vergoeding te bewerkstellig.

Volgens Kallie Kriel, uitvoerende hoof van AfriForum, sal hierdie veldtog van stapel gestuur word met memorandums wat aan die ambassades van lande wat tans Suid-Afrikaanse handelsvennote is, oorhandig sal word.

Dié memorandums sal handel oor die bedreiging van eiendomsreg in Suid-Afrika. Kriel sê dat die memorandum ook aan alle ander ambassades gestuur sal word. Lande wie se burgers beleggings in Suid-Afrika het, sal volgens Kriel in dié memorandum versoek word om druk op die Suid-Afrikaanse regering te plaas om af te sien van planne om die Grondwet te wysig om grondonteiening sonder vergoeding moontlik te maak.

Kriel waarsku dat, sou die Suid-Afrikaanse regering hom nie steur aan buitelandse druk nie en voortgaan om eiendomsreg te bedreig, AfriForum buitelandse beleggers, handelskamers en die Wêreld Ekonomiese Forum direk sal nader om hulle in te lig dat hul beleggings in Suid-Afrika nie veilig is nie.

“Hoewel dit ’n drastiese stap sal wees, sal dit ’n noodsaaklike laaste uitweg wees om te verhoed dat die Suid-Afrikaanse regering die land se ekonomie – deur eiendomsregmiskenning – tot nadeel van almal in die land vernietig. As ’n verantwoordelike organisasie moet AfriForum alles doen om te verhoed dat Suid-Afrika nie deur die miskenning van eiendomsreg ’n tweede Zimbabwe raak wat in armoede gedompel word nie,” het Kriel gesê.

Benewens die vernietiging van Suid-Afrika se ekonomie hou onteiening sonder vergoeding volgens Kriel ook ’n wesenlike gevaar in dat dit konflik in die land kan ontketen. “Konflik is in niemand se belang nie en daarom sal AfriForum alles moontlik doen om internasionale druk te mobiliseer om só die skending van eiendomsreg te verhoed.”

Oor moontlike kritiek op AfriForum se beplande optrede om internasionale beleggers in te lig oor die bedreiging van eiendomsreg in die land, het Kriel gesê dat kritici nie die boodskapper moet aanval bloot omdat hulle nie van die boodskap hou nie.

Volgens Kriel is die oorsaak van die dreigende krisis die feit dat die regerende party sy rug op die beskerming van eiendomsreg gekeer het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

48 Kommentare

jongste oudste gewildste
Elize Smit

Baie dankie, Afriforum. Daar is geen scenario waar on teeing nie die ekonomie nadelig beïnvloed nie.

Johann

Ja Kallie. En wie gaan jy se verteenwoordig jy? Of Afriforum? Veral as jy jou/ julle absurde regs geding kwessies moet probeer regverdig teenoor wat jy die Wereld oor wil inlig? Askuus meneer Kriel, maar jyt enige kans wat Afriforum plaaslik op mag reken as gesonde en gegronde aksies nek omgedraai met jou keuse van sake wat jy beskou as relevant. SO jammer, anders was daar dalk n kans dat iemand actually luister en iets doen….

adriana

Dit sal wonderlik wees indien julle dit kan doen – ek stuur ook sommer hierdie berig na Duitsland sodat dit daar in die koerante geplaas kan word.

Paul

Hoe kan ek ‘n R/c bydrae tot die veldtog maak?

hendrik

Die regering en Malema (asof hy die besluitnemer is) dreig om plase af te vat en dit jaag almal die hoenders in en dan sal dit so gebeur dat hy die 99 jaar huurpag stelsel gaan voorstel en dat die boere maar kan voortgaan met hul normale boerdery.