Grondonteiening-besluit: ‘Teleurstellend, maar te verwagte’

Piet le Roux, uitvoerende hoof van AfriSake. Foto: Reint Dykema

AfriSake het Donderdag sy stem by talle ander organisasies gevoeg wat die ANC se besluit om artikel 25 van die Grondwet te wysig om voorsiening te maak vir grondonteiening sonder vergoeding ten sterkste veroordeel.

Piet le Roux, uitvoerende hoof van AfriSake, het in ʼn verklaring gesê die aankondiging van die ANC is nie verrassend nie aangesien die ANC eiendomsreg “duld, maar nie respekteer nie”. Le Roux het gesê dit is teleurstellend dat die ANC onder die presidentskap van Cyril Ramaphosa weg van ʼn markekonomie beweeg.

“Die ANC is in wese besig om radikale ekonomiese transformasie te versnel. Besluite wat geneem is, sluit onteiening sonder vergoeding en die nasionalisering van die Reserwebank in – maar dit is slegs die hoofopskrifte. Sonder veel uitsondering sal die uitkoms van dié konferensie ekonomies en maatskaplik skadelik wees,” het Le Roux gesê.

“Gelukkig is die slegte nuus meestal ou nuus. Die ANC het nie skielik ’n nuwe rigting ingeslaan nie en die inwerkingstelling daarvan sal omtrent net so lank neem as wat dit in die afgelope jare geneem het. Die georganiseerde sake- en die burgerlike gemeenskap moet hul bes doen om dit selfs moeiliker vir die ANC te maak om hul besluite uit te voer.”

Le Roux het gesê AfriSake sal, waar van toepassing, dié besluit van die ANC sterk met regsaksie teenstaan en, waar nodig, met sterker maatreëls.

Die DA se Thomas Walters het intussen gesê die party staan sterk agter die eiendomsklousules in artikel 25 van die Grondwet en terselfdertyd ook sterk agter die regte van die armes om by die ekonomie ingesluit te word.

Walters het gesê die ANC het misluk om Suid-Afrika uit armoede en ongelykheid te lei en is “verskeur deur korrupsie en wanadministrasie” – daarom probeer die party nou homself herposisioneer as ʼn party van radikale ekonomiese transformasie. “In die proses het die ANC weer gewys dat die party nie gewillig is om die werklike uitdagings in grondhervorming wat ons samelewing in die gesig staar, aan te spreek nie, maar om eerder van die wesenlike kwessies af te wyk,” het hy gesê.

Walters het gesê die werklike probleme met grondhervorming, insluitend massiewe korrupsie en wanbestuur, ʼn teensinnigheid om eiendomsreg aan armes toe te wys, swak administrasie van grondeise en verwante prosesse en swak hulpbron- en begrotingstoewysings deur ‘n onbekwame staat sal nie een deur die voorgestelde wysiging aan die Grondwet uit die weg geruim word nie.

“Die DA sal opstaan vir ons land se Grondwet en eiendomsregte teen ʼn ANC-regering wat net homself wil verryk ten koste van die volk.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
N Lourens Reitz

Nuwe leierskap. Gaan dinge verander? Nee stellig nie. Dit dieselde slang net met ñ ander kop.

John

?..opstaan vir die grondwet wat stuk-stuk gewysig gaan word? Wat help dit om sake in ‘n Afrika-bos-hof te veg as daar geen wette is wat jou saak onderskryf nie. Gaan ons nou stylvol geklee en in hoogdrawende Afrikaans~ servet in die hand ~ netjies oor die krans spring en vriendelik wuif vir ons liefste ‘verstes’, ons aaklige naasbestaandes en al die hogeres in die buiteland wat toe nooit na ons eeuelange ellelange pleidooie geluister het nie? Ongelukkig laat Afrikaners hulle meestal lei deur onervare en lig-in-broek-leiers wat konfrontasies ten alle koste vermy… want die Bybel se glo so. Afrikane was… Lees meer »

Jean

Baie welkom in Afrika! Wat het enigiemand verwag? Dat Suid-Afrika hierdie straal van hoop sal wees in hierdie hart van die duisternis. Hierdie politici in die parlement het die mag en die geleentheid om verandering te betwis deur die misdadigers in die kabinet te verwyder wat voortdurend misdade en korrupsie pleeg. Hulle kon die verslaers van diktature en verdedigers van demokrasie gewees het. Maar hulle het nie besluit om die status quo wat hulle in die afgelope kwart van ‘n eeu onderhou het te handhaaf nie. Net soos die res van die 53 ander Afrika-lande wat die Afrika-kontinent uitmaak, sal… Lees meer »

Chris Ws

Anc of wie ookal,kom vat my eiendom wat ek wettig met swaar verdiende geld GEKOOP het.Bring ‘n lykswa saam want daar gaan beslis lyke wees om weg te ry!Dis gewaarborg.

Org

Ag asb, julle is soos” Bradlows jou winkel vol beloftes”