Grondonteiening: ‘Mense gaan doodgemaak word’

Mosiuoa Lekota, leier van die Congress of the People (Cope), en sy adjunk-sekretaris, Lefu Hanong, spreek die media in Midrand, Johannesburg toe. Foto: Getrude Makhafola/ANA

Mosiuoa Lekota, leier van die Congress of the People (Cope), het Woensdag gesê indien die regering voortgaan met sy plan om eiendom sonder vergoeding te onteien, sal mense doodgemaak word.

“Ek is oortuig indien Suid-Afrikaners die meerderheid in daardie parlement toelaat om mense se eiendom onder dwang te vat … dan gaan swartes, Indiërs en wittes doodgemaak word. In al die sektore van ons bevolking, daar gaan mense wees wat in hierdie land doodgemaak word,” het Lekota aan verslaggewers in Johannesburg gesê.

“As ons vir mans en vroue stem wat avontuurlustig wil wees en roekeloos optree, sal ons dít toelaat om te gebeur – soos in sommige van daardie toesprake wat ek daar by Unisa gehoor het. Daarom sê ek ons wat vir hierdie Grondwet geveg het, sal dit nie toelaat nie. Ons sal dit teenstaan sover ons kan.”

Lekota, ʼn voormalige ANC-kabinetsminister wat destyds saam met talle ander anti-apartheid-struggleveterane op Robbeneiland aangehou is, het probeer duidelikheid skep rakende sy siening van die dreigende grondonteieningswetsontwerp wat deur die parlement aanvaar is. Dit volg nadat hy Maandag uitgejou is tydens ʼn debat oor grond by Unisa se hoofkampus in Pretoria.

Lekota het aan die gehoor gesê dat die grond nie by swart mense gesteel is nie, maar deur strydvoering en oorloë gewen is.

“Julle kan nie sê grond is gesteel nie, dit is verkleinerend. Ons het geveg vir ons vryheid. Ons het nege gevegte volgehou om onsself te verdedig. Daar is nie een Britse weermagbevelvoerder tot vandag toe wat kan beweer hy het die Basotho verslaan en die spits van die Thaba Bosiu-berg [in Lesotho] bereik nie.”

Hy het gesê die staat is in beheer van genoeg grond wat aan mense toegeken kan word, eerder as om grond van eienaars te onteien.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

58 Kommentare

jongste oudste gewildste
AmY

Hierdie man het werklik ‘n kop op sy lyf. Wens meer wil soos hy dink en redeneer..

Wats nuut

Daar word al van 1994 al mense dood gemaak!!! En nog steeds!!!

Alida Savaba

Kan ons asseblief vir Meneer Lekota stem as President van Suid Afrika. Hy praat die waarheid en ken die Geskiedenis van Suid Afrika.

Nicolene

Gelukkig een wat kennis het

Manie

Darem 1 persoon wat weet waaroor dit gaan.