Grondonteiening: ‘SA’ners het niks om te vrees’

Lindiwe Sisulu (Foto: Departement van kommunikasie)

Die Suid-Afrikaanse regering het Woensdag gesê “organisasies soos AfriForum” versprei inkorrekte inligting oor grondhervorming “wat vrees en paniek saai”, en dat “geen Suid-Afrikaner deur hul eie regering bedreig word nie”.

Dit kom nadat Peter Dutton, Australië se minister van binnelandse sake, in ʼn onderhoud met The Daily Telegraph gesê het sy departement is besig om ondersoek in te stel na ʼn reeks maniere om wit Suid-Afrikaanse boere te help om vinnig na Australië te kan emigreer.

Maroela Media het vroeër berig Dutton het gesê hy meen wit Suid-Afrikaanse boere verdien “spesiale aandag” weens die omstandighede waarin hulle hul bevind. Dutton het gesê as daar na beeldmateriaal gekyk word en stories gelees word, is dit duidelik dat wit Suid-Afrikaanse boere “deur gruwelike omstandighede in die gesig gestaar word”. Volgens Dutton is daar ʼn visumkategorie wat voorsiening maak vir mense wat in hul tuisland vervolg word.

Lindiwe Sisulu, minister van internasionale betrekkinge en samewerking, het in ʼn verklaring gesê dit is jammer dat die Australiese regering nie gekies het om die “beskikbare diplomatieke kanale” te gebruik om hul kommer oor die grondhervormingsproses in Suid-Afrika te kenne te gee nie.

Peter Dutton. Foto: Facebook

“Die Suid-Afrikaanse regering was nog heeltyd baie duidelik en deursigtig oor die grondhervormingsproses en die saak is nou voor die parlement. Alle rolspelers sal betrek word en hulle word ook aangemoedig om met die parlement in gesprek te tree,” het Sisulu gesê.

Die minister het herhaal dat die proses van grondhervorming “ordelik” gedoen sal word binne die raamwerk van die Suid-Afrikaanse wetgewing en dat die maatskaplike en ekonomiese impak daarvan in ag geneem sal word.

“Daar is geen rede vir enige regering enige plek ter wêreld om te vermoed dat enige Suid-Afrikaner in gevaar is van hul eie demokraties-verkose regering nie. Daardie bedreiging bestaan doodgewoon nie.”

Volgens Sisulu sal die Suid-Afrikaanse regering met die Australiese regering in gesprek tree oor die saak.

Intussen het AfriForum gesê Dutton se uitsprake oor Suid-Afrikaanse boere is “’n ernstige aanklag teen die Suid-Afrikaanse regering”.

Volgens Alana Bailey, adjunk- uitvoerende hoof van AfriForum verantwoordelik vir internasionale skakeling, neem die Australiese minister duidelik kwessies soos die hoë voorkoms van plaasaanvalle, misdaadstatistieke en die regering se stappe om onteiening sonder vergoeding moontlik te maak ernstig op, terwyl die Suid-Afrikaanse regering die kwessies bloot ignoreer of as ongegronde vrese afmaak.

alana bailey afriforum

Alana Bailey

“Verder erken hy skynbaar ook dat die kommer van wit Suid-Afrikaners net so geldig soos dié van enige ander landsburger is, terwyl die Suid-Afrikaanse owerhede al te graag dié gemeenskap as sondebokke vir probleme in die land voorhou en hulle soos tweedeklasburgers behandel,” sê Bailey.

Bailey meen Dutton, as verteenwoordiger van ’n suksesvolle internasionale demokrasie, se houding behoort stof tot nadenke vir die regering te wees. “Dit moet as waarskuwing dien dat Suid-Afrika die gevaar loop om nog meer produktiewe, lojale burgers te verloor as daar nie met erns na hul kommer oor kwessies soos eiendomsregte geluister word en daadwerklike aksies geloods word om probleme soos misdaad in die land aan te pak nie.”

Sy het gesê AfriForum se standpunt bly dat oplossings vir die probleme wat Afrikaners en ander minderhede in Suid-Afrika ondervind, gevind moet word en dat ’n toekoms aan die suidpunt van Afrika geskep moet word waarin ook Afrikaners en ander minderhede blywend vry, veilig en voorspoedig kan voortbestaan. “Die organisasie verwelkom verder enige internasionale druk wat die uitdagings wat minderhede in die gesig staar in die kollig plaas en die regering help oortuig om dit te prioritiseer.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

92 Kommentare

jongste oudste gewildste
christa

nou dat ‘n ander land kan sien wat in SA aangaan skrik die regering wakker. Ek is seker in Australie gaan dit beter met die witmense. Jy hoor nie heeldag van moord en doodslag en plaasmoorde nie. Gelukkig is daar nog ‘n regering wat Kan regeer en nie een wat Wil regeer nie

Rynhardt

Minister Sisulu,mense het niks te vrees oor grondonteiening nie???Vertel asb.u stelling vir die paashaas!Jammer,maar u en Anc is nie geloofwaardig nie.As blankes vir die Anc belangrik was,dan sou regstellende aksie nie 24 jaar al geduur het nie.Mense sien deur die Anc!!!

Wessel

Dit is nie Afri-forum wat ‘vals’ berigte die wereld instuur nie. Die SA regering en Eff doen dit sommer self met hulle ondeurdagte uitsprake. Dit sal n heuglike dag wees as al die blankes eensklaps in n ander land kon wees. Ek wonder wie en wat gaan dan blameer word vir hulle ellende

Ray

“Suid Afrikaanse” regering praat met gesplete tonge en probeer die waarheid verdoesel.

Lee

Dink die Regering nou regtig ons is almal onnosel. Ons het opgelet in die klas. Hulle wil SA ‘n tweede Zimbabwe maak deur van ons boere ontslae te raak deur te moor. As ek ‘n boer was sal ek defnitief Australia toe gaan en daar in vrede gaan boer. Kom ons kyk hoe hulle mense gaan boer in SA. Ons sal als moet invoer want hulle sal als afbreek en afbrand.