Gru-video van moord op vrou nié in SA geneem

‘n Skermskoot uit die video.

ʼn Grafiese video van ʼn vrou wat op gruwelike wyse met ʼn panga onthoof word, het tans talle sosialemediagebruikers in Suid-Afrika op hol.

Op die video kan gesien word hoe minstens drie mans ʼn vrou in ʼn beboste gebied insleep voordat sy herhaaldelik met ʼn mes in die bolyf gesteek en met ʼn panga onthoof word. Die video word tans wyd op sosiale media en WhatsApp versprei met bewerings dat dié grusame voorval tydens ʼn plaasaanval in KwaZulu-Natal gebeur het.

Talle lesers het Maroela Media oor die video genader om navraag te doen of die video werklik tydens ʼn plaasaanval in Suid-Afrika geneem is.

Die voorval het egter nié in Suid-Afrika gebeur soos beweer word nie. Volgens die webwerf ViaRondônia het die voorval in Januarie vanjaar in die Caladinho-streek in Brasilië gebeur. Die webwerf identifiseer die jong vrou in die video as Déborah Bessa (19), wat vermis was voordat haar liggaam op 13 Januarie in ʼn vlak graf in die beboste gebied gevind is.

Volgens die webwerf is die moord uitgevoer deur lede van die Comando Vermelho-bende. Daar word beweer dat Bessa deel was van ʼn vyandige bende en dat dit die motief vir haar moord was.

Die webwerf Ampost berig daar is ʼn video van die moord geneem om vrees by die mededingende bende in te boesem. Die webwerf berig ook ʼn familielid het gesê Bessa het kort voor haar moord gesê sy wil haar lewe verander en nie meer by misdaad betrokke wees nie.

NewsRondonia berig André de Souza Martins (28) is ná die moord in hegtenis geneem en het glo erken hy het die jong vrou uit wraak vermoor. Die video is volgens die berig gevind op ʼn selfoon waarop die polisie beslag gelê het ten tyde van die inhegtenisneming.

ʼn Woordvoerder van die polisie in KwaZulu-Natal het aan Maroela Media bevestig dat die SAPD kennis dra van die video en dat die voorval beslis nie in Suid-Afrika gebeur het nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

51 Kommentare

jongste oudste gewildste
Cindy

Die wereld het mal geword

devill

Ek wonder of moordenaars ooit dink aan die mense wat hulle al vermoor het.
Ek wonder of die drie mans ooit weer aan haar gedink het nadat hulle haar gesteek en onthoof het.
Dit is verskriklik!

Tiaan

Mense asb dink voordat jy so iets aanstuur en net aanneem dit gebeur in Suid Afrika daar is soveel FOPNUUS omdat iemand ‘n stertjie bylas vir hul eie agendas!

bgj van der westhuizen

ja dit kan hier ook gewees het wand hier word mense ook so vreed vermoor en gemartel maar dit word nooit oopblik geys nie wand die sapd en die anc regering smeer dit toe

Reguit

Alles op die video is presies hoe ons boere vermoor word. In die meeste plaasnanvalle is dit nog erger—verkrag, strykyster, petrol, kook water, en so kan ek aangaan. Dis goed dat die wereld dit sien.