Nooddienste in Pretoria het Vrydagoggend die liggaam van ʼn 45-jarige man uit die stroom langs die R80/Mabopane-hoofweg naby die Hebron gehaal.
“Nooddienste is omstreeks 07:45 na die toneel ontbied waar Tshwane-metropolisie bystand versoek het toe hulle op die liggaam van ʼn man afgekom het,” sê Charles Mabaso, woordvoerder van Tshwane-nooddienste.
Die span het ʼn rubberboot gebruik en die liggaam van ʼn man, vermoedelik 45 jaar oud, uit die stroom gehaal. Die man het kneusplekke aan sy gesig opgedoen en dit wil voorkom of hy al langer as ʼn dag in die water was.
“Die liggaam is aan die Suid-Afrikaanse Polisiediens oorgegee. ʼn Geregtelike doodsondersoek word gedoen.”