Guy Fawkes-vieringe moet waai

(Foto: Twitter)

Die Stad Kaapstad sê die “misplaaste tradisie” van ʼn minderheid om Guy Fawkes-nag te vier tot groot ongerief van die meerderheid inwoners, moet stopgesit word.

JP Smith, burgemeesterskomiteelid vir veiligheid en sekuriteit, het skerp gereageer nadat bykans 300 voorvalle van die skiet van vuurwerk laas nag in die stad aangemeld is.

Guy Fawkes-nag word tradisioneel op 5 November gevier en dit gaan gewoonlik gepaard met groot hoeveelhede vuurwerk wat geskiet word.

Smith het gesê die stad se noodoproepsentrum het tussen 06:00 en 23:00 gister 345 oproepe ontvang, waarvan die meeste verband gehou het met die skiet van vuurwerk.

In Lavender Hill, waar ʼn groep van nagenoeg 100 jongelinge saamgedrom het, is motoriste onder die klippe gesteek. Metropolisiebeamptes het in Kleinvlei, Eersterivier en Ravensmead beslag gelê op vuurwerk, terwyl die polisie in Atlantis, Big Bay en Athlone dieselfde gedoen het.

Die brandweer is ontbied nadat bosse weens vuurwerk naby Jakkalsvleiweg, Bonteheuwel, en by Connaughtweg in Cravenby Estate aan die brand geraak het. Die vlamme is egter geblus voor die nooddienste daar aangekom het, het Smith gesê.

Stadsbeamptes het vuurwerkpersele wat spesifiek vir Diwali-vieringe toegewys is, dopgehou, maar teen 21:00 gister is geen aktiwiteit daar aangemeld nie.

“Deur die loop van die dag was daar talle berigte van plunderende jeugdiges wat mense en voertuie aanval. Die video van ʼn voorval in Elsiesrivier, waar ʼn groep kinders ʼn man aangerand het, is die bewys van dít wat jaar na jaar in verskeie van ons gemeenskappe afspeel.

“Op sosiale media het foto’s die ronde gedoen van ʼn 14-jarige seun wat glo met ʼn baksteen aangeval is,” het Smith gesê.

“Dis onmoontlik om die koste te bereken vir die mense wie se eiendom beskadig word, of verwoes is deur vandale wat op Guy Fawkes[-dag] die strate invaar. ʼn Duik in ʼn voertuig kan duisende rande kos om te herstel, maar die sielkundige uitwerking is veel groter.

“Iets moet meegee.

“Daar is absoluut geen regverdiging vir dié grieselige feesviering en die pyn en lyding wat dit veroorsaak nie, om nie eens te praat van die las op die stad en polisiehulpbronne om die tientalle klagtes wat daaruit spruit, te hanteer nie. Dit hou hulle weg van ánder belangrike polisiëringswerk in die stad.”

Smith het ʼn beroep gedoen op gemeenskapsleiers, skole en gesinne om te praat oor Guy Fawkes-vieringe en die chaos wat dit veroorsaak.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

33 Kommentare

jongste oudste gewildste
EKKE

VERBIED ASB ALLES VUURWERKE!!

Deloris

Ek sekondeer, alle vuurwerke moet verband word. Dis n mors van geld en ons diere ly daar onder.

wielie

Die gemors waai oor van Amerika ……. niks met SA te doen.

Sunset

Ek stem ten volle hiermee saam. Dis nie sinoniem met ons as Suid-Afrikaners nie maar wel tradisie in Amerika. Ons as Suid-Afrikaners moet almal saam staan om djd vuurwerke in sy geheel en al in Suid Afrika te stop asook so met oujaars aand. Daai geld wat daarop gespandeer word kan liewer aan spca, wetnose en alle diere organisasies geskenk word

marous

Kan aan ‘n paar plekke dink waar dit ingedruk kan word . Die aanvalle en plundering sal ook dadelik tot ‘n einde kom .