Hankey-plaasaanval: ‘Ons is soos diere gejag’

Sebenzile Simane (32), ‘n voormalige plaaswerker, verskyn in die hooggeregshof in Port Elizabeth. (Foto: Raahil Sain/ANA)

WAARSKUWING: Die berig bevat besonderhede wat nie geskik is vir kinders of sensitiewe lesers nie.

ʼn Ma van Hankey in die Oos-Kaap het Dinsdag in die hooggeregshof in Port Elizabeth getuig sy en haar drie kinders “is soos diere gejag” die aand toe ʼn man by hul plaashuis ingebreek het.

Die 44-jarige vrou het getuig sy kan steeds haar kinders se gille en die angs op hul gesigte onthou toe ʼn voormalige plaaswerker verskeie skote deur ʼn glasdeur geskiet en die plaashuis binnegekom het. Volgens die vrou het sy die aand van 23 Maart 2018 gereedgemaak om in die bed te klim en televisie te kyk toe die aanvaller net ná 20:00 toegeslaan het en haar kinders nog in die sitkamer was.

Die kinders het in die gang afgehardloop gekom en die twee jongste kinders het in haar slaapkamer ingehardloop terwyl die tiener na die badkamer gehardloop het. In dié stadium is sy reeds geskiet en het sy haar liggaam teen die deur gedruk om te probeer keer dat die aanvaller in die kamer kan kom. Hy het egter begin skote afvuur.

Volgens die vrou het dit skielik stil geword en het sy ʼn vuurwapen wat sy uit die kluis gekry het, probeer laai. “Ek het dit probeer laai aangesien ek geweet het hoe. Dit was onsuksesvol. Ek is geskiet en ek was so bang dat ek nie daarin kon slaag om dit te laai nie,” het sy in trane getuig.

Sebenzile Simane (32) het skuld ontken op ʼn string aanklagte wat insluit huisbraak, roof, menseroof, ontvoering, verkragting, poging tot verkragting, die feit dat hy ʼn kind gedwing het om ʼn seksuele oortreding te aanskou, poging tot moord, die onwettige besit van ʼn vuurwapen en ammunisie asook roof met verswarende omstandighede.

Die aanvaller kon daarin slaag om in die slaapkamer te kom nadat hy die skuifdeur se glas stukkend geskiet het. Simane het glo in die kamer ʼn vuurwapen teen die negejarige seun se kop gehou. Volgens die vrou was die aanvaller vermoedelik geïrriteerd omdat die tiener verdwyn het.

Simane het die gesin glo later na die sitkamer gedwing waarna die tiener ook met sy hande in die lug by hulle aangesluit het. “Hy was baie aggressief en het gedreig om te skiet. Die kinders was angsbevange maar doodstil aangesien hulle nie iets wou doen wat hom meer kwaad sou maak nie.”

Volgens die vrou het Simane na bewering geglo daar word R9 000 aan hom geskuld en het hy vir die kinders gesê hy is kwaad vir hul pa. “Hy wou weet waar my man was en het gesê hy sal hom eerste en dan die res van ons doodmaak.”

Die vrou het getuig sy het vir die aanvaller R600 uit haar handsak gegee, asook haar bankkaarte en vir hom gesê hy kan nog geld by ʼn kitsbank gaan trek. In dié stadium het Simane hulle begin vasbind. Hy het glo na die kinders gedraai en gesê hy gaan hul ma verkrag en hulle gaan moet kyk.

Volgens die vrou het sy hom gesmeek om haar nie voor haar kinders te verkrag nie waarna hy haar na die slaapkamer gesleep en op haar bed verkrag het. Nadat Simane haar glo verkrag het, het hy na bewering haar een dogter gaan haal en haar langs haar ma op die bed laat sit. Hy het toe glo gedreig om haar ook te verkrag.

“Ek het net geskree: moet haar asseblief nie verkrag nie, sy is te jonk. Sy is net 12 jaar oud, dis nie moontlik nie. Moet haar asseblief nie verkrag nie.”

Die vrou is hierna glo voor haar dogter verkrag. “Hy het seker gemaak sy sou kyk, al het sy probeer wegkyk.”

Die hof het hierna vlugtig verdaag aangesien die vrou erg emosioneel geraak het. Van die hofbeamptes was ook in trane ná die ma se getuienis.

Die vrou het later haar getuienis hervat en gesê sy en haar dogter is later teruggevat na die sitkamer toe waar die aanvaller een van die vrou se sigarette aangesteek en dit vir haar gegee het om te rook.

“Hy het aanhou dreigemente maak teen my man en gesê hy sal hom opkap en dat hy vir hom wag.” Sy het hierna glo aangebied om hom na ʼn kitsbank te neem aangesien hy nie haar motor aangeskakel kon kry nie. Volgens haar wou sy hom net wegkry van haar kinders af en het sy gehoop hulle sal dan hulp ontbied.

Volgens die vrou was sy in dié stadium al baie swak aangesien sy baie bloed verloor het, maar het sy met hom dorp toe gery waar hy teen omstreeks 23:30 R4 000 onttrek het. Volgens haar wou hy nog geld trek en het hy vir haar gesê om na ʼn grondpad te ry en daar te wag tot middernag. Terwyl hulle gewag het, het Simane glo weer gedreig om haar op die agterste sitplek van haar voertuig te verkrag.

Volgens die vrou het sy in dié stadium besef sy het baie bloed verloor en vir hom gesê sy “weet hy is nie ʼn slegte persoon nie” en by hom gepleit om haar kinders te gaan haal en na ʼn hospitaal toe te gaan.

Hy het kort ná middernag nog geld onttrek, die sakke vol goed wat hy geroof het, gevat en vir die vrou totsiens gesê voor hy op die vlug geslaan het.

Volgens die vrou het sy terug na die plaas gery en gesien daar is ligte aan by familie van haar man se huis. “Hulle het met hul vuurwapens uitgekom en die kinders was reeds daar. Ons was almal in so ʼn toestand.”

Die verhoor gaan Woensdag voort.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

79 Kommentare

jongste oudste gewildste
Andreas

So is mense ook al in parke in stede en woonbuurte agtervolg en gejag. dit gebeur nog daagliks, self in jou oprit is jy nie veilig nie.

Alledaags.

marous

Geen woorde kan die walging omskryf nie .

Henk Hefer

Laat ek liewer stibly.

Henk Hefer

Stilbly.

Frederick

Hartseer is stom.