Harmony-brand: Al 487 mynwerkers gered

Argieffoto Foto: Leandro Neumann Ciuffo van Rio de Janeiro, Brasilië (Mina da passagem) via Markos90, Wikimedia Commons

Argieffoto Foto: Leandro Neumann Ciuffo van Rio de Janeiro, Brasilië (Mina da passagem) via Markos90, Wikimedia Commons

Die 487 mynwerkers wat ondergronds vasgekeer was na ʼn brand by Harmony se Kusasalethu-goudmyn in Carletonville in die weste van Gauteng, is na die oppervlak gebring.

“Almal is veilig na die oppervlak gebring,” het Memory Johnstone, woordvoerder van Harmony, gesê. Geen sterftes of beserings is aangemeld nie. “Die werknemers sal vir waarneming gestuur word om seker te maak hulle is almal fisies gesond.”

Johnstone het gesê die brand is onder beheer gebring. “Daar sal ʼn skadeberekening gedoen word maar die belangrikste was om seker te maak almal is veilig.”

Pres. Jacob Zuma het intussen sy skok en kommer oor die voorval uitgespreek. “Ek doen ʼn beroep op alle Suid-Afrikaners om die mynwerkers in hul gedagtes en gebede te hou in die moeilike tyd.”

Die brand het omstreeks 09:40 Sondagoggend op vlak 75 sowat 2 300m ondergronds ontstaan. “Sowat 287 van die 486 werkers is veilig in toevlugareas onder die grond waar daar vars lug, water en telefoonkommunikasie is,” het Harmony vroeër in ʼn verklaring gesê.

Die brand het glo ontstaan tydens instandhouding van ʼn reuse lugverkoeler. Alle bedrywighede by die myn is opgeskort.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

Paul Mardon ·

Brande is deur die geskiedenis van SA myne een van die grootste oorsake van mynrampe. Dit is verskriklik dat so iets ondergronds gebeur, maar ek is baie verheug en dankbaar dat daar geen sterftes of ernstige beserings was nie. Daarvoor verdien Harmony en MRS ‘n pluimpie: Dit is knap gedaan! Kom ons dank en loof ons Hemelse Vader dat Hy die vasgekeerdes gered het.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.