Harrismith-plaasmoord: Bestuurder al van geboorte op plaas

Argieffoto: Nico Strydom

Argieffoto: Nico Strydom

Die man wat Vrydagaand op ʼn beesplaas buite Harrismith in die Vrystaat vermoor is, het sedert sy geboorte op die plaas gebly en agt van sy kinders daar grootgemaak.

Robert Rhadebe (67) en sy vrou, Martha, is die aand deur twee verdagtes in hul huis oorval en vasgebind. Albei is met ʼn mes aangeval en gesteek en Robert het aan sy beserings beswyk.

Danie Badenhorst, eienaar van die plaas, het aan Maroela Media gesê Robert was sy regterhand op die plaas wat elke aspek van die boerdery bestuur het. “Hy was nie net ʼn bestuurder nie, hy was my vriend. Ons was redelik na aan mekaar,” het hy gesê.

Robert is op die plaas gebore en hy en Badenhorst het mekaar leer ken toe Badenhorst die grond in 1976 gekoop het. “Hy het sy agt kinders hier grootgemaak en hulle is almal baie suksesvol en gekwalifiseerd. Een is in IT, ʼn ander in verpleegkunde, nog een in die veiligheidsindustrie en hulle is almal hoogs suksesvol,” het hy gesê.

Robert Rhadebe (67) en sy vrou, Martha (Foto verskaf aan Maroela Media)

Robert Rhadebe (67) en sy vrou, Martha (Foto verskaf aan Maroela Media)

Badenhorst het gesê hy het self Saterdagoggend Robert se liggaam ontdek. “Die huurders wat op die plaas bly het Martha omstreeks 07:15 buite hul huis sien sit. Sy was nog steeds vasgemaak en kon net daarin slaag om tot buite die huis te kruip. Hulle het my dadelik gebel en ek het onmiddellik [van Harrismith af] plaas toe gery.”

Hy het gesê hy het Robert se liggaam in een van die kamers aangetref onder ʼn klomp klere en linne. “Sy gesig was erg geskend. Ek het nie verder na die wonde op sy liggaam gekyk nie, maar ek weet hy is met ʼn mes aangeval,” het hy gesê. Martha het ook steekwonde aan haar arms en bolyf opgedoen en is na ʼn plaaslike hospitaal gehaas. Sy is sedertdien weer ontslaan en sterk tuis aan.

“Ons het reeds gereël dat ʼn sielkundige met haar kom praat. Sy is natuurlik baie getraumatiseerd,” het Badenhorst gesê. Robert se begrafnis sal na verwagting Saterdag plaasvind.

Sers. Mmako Mophiring, woordvoerder van die polisie, het gesê sake van huisbraak en moord word ondersoek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

6 Kommentare

anet ·

Dit is baie hartseer vir my Danie,dat jy jou vriend en Bestuurder op so wrede mannier moes verloor. Stertke aan Martha, en kinders, asook aan Danie en sy gesin

J.Z ·

Nee Darren,dit het niks met witmense te doen nie .Dit is weer n plaas aanval wat sekere mense nie van wil weet nie.

SNEL ·

Baie sterkte aan almal. Hartseer dat mens nêrens meer veilig is nie, veral nie eers in jou eie huis nie.

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.