Helen Zille amptelik geskors

helen-zille-da-op-flickr

Helen Zille, premier van die Wes-Kaap en voormalige leier van die DA. Foto: DA/Flickr.com

Die federale uitvoerende raad van die Demokratiese Alliansie het Woensdagoggend met ʼn meerderheidstem besluit om Helen Zille van alle partyverwante aktiwiteite te skors totdat haar dissiplinêre verhoor afgehandel is.

James Selfe, voorsitter van die DA se federale uitvoerende raad, het gesê die skorsing tree onmiddellik in werking.

Mmusi Maimane, leier van die DA, het Saterdag voorgestel dat Zille ʼn kennisgewing van skorsing moet ontvang, waarna sy 72 uur gehad het om redes te verskaf waarom sy nie geskors moet word nie. Ná die raad Zille se redes oorweeg het, het hulle amptelik die besluit geneem om haar te skors.

Die dissiplinêre verhoor begin Vrydag, 9 Junie 2017.

Die raad het saamgestem dat Zille se uitlatings op sosiale media en in die publiek, wat met kolonialisme verband hou, die publiek se vertroue afbreek, Suid-Afrika se versoeningsbeleid beperk en die DA se “politieke projek” ondermyn.

“Daar is geen twyfel nie dat Zille se oorspronklike uitlatings op Twitter en gevolglike regverdiging daarvan ons reputasie skade berokken het. Ons woon in ʼn sensitiewe demokrasie wat beteken dat ons openbare verteenwoordigers ten alle tye sensitief moet wees tot die regmatige woede wat persone steeds oor ons verlede en die nalatenskap daarvan ervaar,” het Selfe gesê.

“As ʼn voormalige leier en ʼn lid van die federale uitvoerende komitee, het Zille ʼn spesiale plig om die party se belange te beskerm en die party se missie te bevorder om ʼn nie-rassige, inklusiewe demokrasie te bou. Zille se uitlatings is teenstrydig hiermee.

“Maimane het alles in sy vermoë gedoen om die saak op te los. Sy vorige pogings, te goeder trou, was tot dusver tevergeefs. Hy het Zille versoek om ʼn volledige verskoning aan te bied vir haar optrede.

“Zille het egter geweier om die behoorlike stappe te doen om hierdie saak op te los. Haar voortgesette kommunikasie oor die saak berokken steeds skade vir die party,” het Selfe bygevoeg.

Hy het dit benadruk dat Zille steeds haar rol as premier van die Wes-Kaap beklee. “Daar is nie ʼn verdeling tussen staat en party nie en die skorsing het nie enige impak op haar rol in die regering nie. Die saak hou slegs verband met haar posisie in die DA.”

Lees alle vorige berigte oor Helen Zille op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

115 Kommentare

jongste oudste gewildste
WP

Ek waai saam met Helen. Cheers.

Kaspaas

OK… ek sien in ander nuus die Britse Leeus het hulle wedstryd verloor in NZ

Richard

Lyk my dis tyd om maar van party te verander, asof daar nie genoeg ander goed is op te fokus nie hou die DA hulle hulself op met sulke snert.

Petrus

Zille se uitlatings dat kolonialisme nie slegs negatiewe nalatenskap het nie is bewysbaar. Enige een met ‘n gebalanseerde beskouing moet dit tog kan insien.

Die DA se blinde ideologiese en ongebalanseerde optrede bewys maar net dat hulle finaal besig is om in ‘n tweede ANC te ontaard.

Hartseer.

Verstom

Helen begin jou eie party!!!!