Helen Zille geskors

OPVOLG: Lees meer oor Helen Zille se reaksie en die DA se opvolgverklaring hier.

helen-zille-da-op-flickr

Helen Zille, premier van die Wes-Kaap en voormalige leier van die DA. Foto: DA/Flickr.com

Helen Zille, die voormalige leier van die DA en die Wes-Kaapse premier, is uit die DA geskors ná haar omstrede twiets oor kolonialisme.

Mmusi Maimane, leier van die DA, het die aankondiging Saterdag tydens ʼn mediakonferensie in Johannesburg gemaak.

Maroela Media het vroeër berig Maimane het in Maart vanjaar ʼn klag by die DA ingedien nadat Zille se Twitter-uitsprake oor kolonialisme ʼn sosialemedia-storm ontketen het. Zille het in ʼn reeks twiets bevraagteken of “elke aspek van kolonialisme sleg was”. Haar uitsprake het wyd kritiek uitgelok.

Maimane het Saterdag gesê dit het vir hom duidelik geword dat hy en Zille se houdings oor wat die DA in 2019 moet bereik, en die doelwitte en prioriteite wat uit hierdie missie uit spruit, “grondliggend van mekaar verskil”. Hy het gesê Zille se kommentaar en openbare uitsprake oor kolonialisme ondermyn die DA se versoeningsprojek.

“Daar is geen twyfel dat me. Zille se oorspronklike twiets en gevolglike regverdiging daarvan ons naam in die oë van die publiek skade berokken het nie,” het Maimane gesê.

“Ons lewe in ʼn baie brose demokrasie wat beteken ons openbare verteenwoordigers moet, te alle tye, sensitief wees teenoor die geldige woede wat ons mense steeds voel oor ons verlede en sy nalatenskap. As die leier van die party is dit my plig om die publiek se vertroue weer op te bou,” het Maimane gesê.

“In hierdie aspek het ek me. Zille gevra om onvoorwaardelik aan Suid-Afrika en die DA om verskoning te vra vir die skade wat sy veroorsaak het. Ongelukkig het sy geweier. In hierdie tyd het me. Zille voortgegaan om die party skade te berokken met verskeie kommunikasiestukke wat dit wat ons probeer bereik, ondermyn. Die [DA se] federale uitvoerende komitee het dus besluit dat [Zille] geskors sal wees van alle party-aktiwiteite totdat haar dissiplinêre verhoor afgehandel is. ʼn Kennisgewing van haar skorsing is aan haar gestuur.”

Maimane het gesê dit was nie ʼn maklike besluit om te neem nie, maar dat hy doen wat reg is vir die party en die land. “Ek glo daar is hoop vir ons wonderlike nasie. Al meer mense sien dat ons ʼn post-ANC-toekoms moet bou. Hierdie toekoms sal ʼn DA-geleide koalisieregering wees wat op die waardes van vryheid, regverdigheid en geleentheid gegrond is.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

162 Kommentare

jongste oudste gewildste
DA?

Nee Mmusi, met hierdie stap het DA my stem verloor. Jy is so gefokus om polities korrek te wees, dat jy in die hande van ANC speel. DA is deesdae inderwaarheid ANC-light. Ek het dit aanvanklik nie geglo nie, maar moet nou bes gee…

Elize Grobbelaar

DA gaan baie steun verloor. Ek gaan beslis nie meer DA stem nie!

Lol

Die enigste fout wat Zille gemaak het was om die waarheid te praat. Nuwe Suid-Afrika hou nie daarvan om dit te hoor.

Johanna Botha

Kry sy seker maar net wat sy voor gevra het …sy voel dalk nou soos die meeste mense wat SA weggegee het op n skinkbord en stank vir dank gekry het …moet n bitter pil wees glo ek. Maar ek kan se in ons area doen die DA beter as wat die anc gedoen het …minste is die papiere nou opgetel en gras geny …dis n begin !

SI

Begin jou eie party Helen…vermoed die DA gaan stemme verloor