Hennenman-plaasmoord: Eddie Hills (26) sterf

Eddie Hills.

Eddie Hills (26) is oorlede.

“Jy is by die huis, my beer, wag vir ons en slaap sag,” het sy vriendin, Marizanè du Plessis, Woensdagmiddag op sosiale media geskryf.

Medelye stroom sedertdien in.

Eddie is Maandag breindood verklaar nadat hy en sy pa einde verlede week op hul plaas naby Hennenman in die Vrystaat aangeval is.

Pieter Hills (56) is tydens die aanval op teregstellingswyse doodgeskiet. Eddie is in die nek geskiet nadat hy glo op die aanval afgekom het.

Eddie is aanvanklik ná die aanval in ʼn kritieke toestand in ʼn hospitaal op Welkom opgeneem voordat hy later die dag per lugambulans na die Milpark-hospitaal in Johannesburg oorgeplaas is.

Eddie Hills en sy vriendin Marizanè du Plessis. (Foto: Facebook)

“Eddie is breindood en sou ʼn kwadrupleeg gewees het. Ons wag dat sy groot boerseunhart ophou klop,” het sy ma, Antionette, Maandagaand laat weet.

Vier verdagtes is oor die naweek in Phomolong in hegtenis geneem in verband met die aanval nadat speurders van die Hennenman-polisie en lede van die misdaadvoorkomingseenheid onverpoos gewerk het om ʼn deurbraak in die saak te maak.

Een van die verdagtes, ʼn 47-jarige man, is egter Saterdag in die vroeë oggendure dood in ʼn polisiesel aangetref nadat hy homself gehang het.

Tshidiso Patrick Bochedi (36) het Maandag in die Hennenman-landdroshof verskyn op aanklag van sameswering om moord te pleeg, poging tot moord en huisroof. Hy bly in aanhouding tot hy weer eerskomende Maandag in die hof sal verskyn om sy aansoek om borgtog te begin.

Die tweede verdagte sou na verwagting vandag in dieselfde hof verskyn, terwyl die derde een vrygelaat is nadat sy nie positief met die misdaad verbind kon word nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
RS

Ai Ai. Baie sterkte vir almal.

Misky

Dis so tragies en hartseer. Baie sterkte aan tannie Antoinette. Jy is in elke SA’ner se gebede vandag en die dae wat voorlê en moeilike tyd

Sara

Dis vreeslik hartseer. Baie sterkte aan sy geliefdes.

Suzette

Dis baie hartseer!! My hart breek oor al die onsinnige moorde in hierdie land. Hoekom kan daar nie net vrede wees en almal rustig en veilig in hierdie land woon nie.

Persheks Adri

My hart is stukkend vir ons boere! Hierdie kind was nog so jonk en sy hele lewe was voor hom. Baie sterkte aan die familie en vriende in die moeilike tyd mag God julle dra! Rus sag my kind