Nico Henning (regs) tydens sy vorige verskyning by die Pretoria-streekhof. Foto: Werner Beukes / SAPA
Nico Henning, die vermoorde Chanelle Henning se vervreemde man, gaan na verwagting Donderdag weer in die Pretoria-streekshof verskyn in verband met haar moord.
Tydens sy vorige hofverskyning op 13 November 2014 het staatsaanklaer Gerrie Nel gevra dat die verrigtinge uitgestel word, aangesien die staat nie gereed was nie.
Henning sal na verwagting Donderdag amptelik aangekla word, waarna die saak na die hooggeregshof in Pretoria oorgeplaas sal word. Sy verhoor sal voorlopig van 8 tot 12 Julie plaasvind.
Henning, die beweerde meesterbrein agter die huurmoord op Chanelle, is in Desember 2013 onder streng voorwaardes op borgtog van R10 miljoen vrygelaat.
Chanelle (26) is in November 2011 in Faerie Glen, Pretoria, doodgeskiet nadat sy haar seuntjie by die kleuterskool afgelaai het.
Henning het homself op 6 Desember 2013 aan die polisie in Villieria, Pretoria, oorgegee. Sy borgtogvoorwaardes behels dat hy Maandae en Vrydae by die Hartbeespoortdam-polisiestasie moet aanmeld en nie nader as 1 km aan ’n internasionale vertrekpunt mag kom nie.
Hy moet ook toestemming van die ondersoekbeampte, kapt. Petrus van der Spuy, bekom indien hy enige van sy private vliegtuie wil nader. Henning mag nie Gauteng of Noordwes verlaat sonder om vooraf toestemming van die ondersoekbeampte te kry nie.
Hy mag ook nie enige kontak hê met ʼn lys van staatsgetuies nie, waaronder Andre Gouws, Ambrose Monye, verskeie van Chanelle se familielede, en werknemers van die Avis-motorhuuragentskap.
Lees alle berigte wat met Chanelle Henning verband hou, op Maroela Media.
