Herrie oor Castle-veldtog ná Ashwin Willemse-sage

‘n Twiet deur Castle Lager SA oor die veldtog.

ʼn Nuwe veldtog deur Castle Lager SA in reaksie op die omstrede Ashwin Willemse-sage het ʼn storm op sosiale media ontketen.

Castle Lager het Maandagaand op sy amptelike Twitter-profiel aangekondig die maatskappy gaan “in die lig van onlangse gebeure” van die etiket op hul bier ontslae raak in solidariteit met almal wat op ʼn daaglikse grondslag op ʼn onregverdige en gevoellose manier geëtiketteer word. “Hierdie klein daad is ʼn belofte dat Castle Lager sal werk om die etikette wat ons verdeel uit te roei.”

Die inskrywing is gedeel met die hutsmerke #SmashTheLabel en #AshwinWillemse.

Die veldtog hou verband met ʼn voorval Saterdagaand toe Ashwin Willemse, voormalige Springbokvleuel en SuperSport-spelontleder, tydens ʼn regstreekse uitsending van die stel van ʼn SuperSport-program afgestap het ná ʼn woordewisseling met sy mede-aanbieders, Nick Mallet en Naas Botha. Willemse het voordat hy die stel verlaat het, gesê hy “is vir ʼn lang tydperk as ʼn kwotaspeler bestempel” en sal nie “verkleineer word deur twee individue wat in apartheid, ʼn gesegregeerde era, gespeel het nie”.

Die voorval het groot opslae gewek met talle mense wat onmiddellik tot die gevolgtrekking gekom het dat die konflik tussen Willemse en sy mede-aanbieders ʼn rasse-ondertoon het.

Castle Lager het egter sedert Maandagaand deurgeloop oor dié veldtog wat deur talle bestempel is as ʼn manier om Willemse se “kant te kies” sonder dat al die feite oor die voorval bekend is. Op Twitter het een sosialemediagebruiker gevra hoekom Castle aanvoer hy kies nie kant nie, maar tog die veldtog doen ter ondersteuning van Willemse.

“Ons het Suid-Afrika se kant gekies. Ons wil graag ʼn lig laat skyn op stereotipes en etikettering deur in gesprek te tree. As ʼn handelsmerk wat nog altyd praat oor inklusiwiteit en vriendskap, glo ons ons kan deel wees van die verandering,” het Castle Lager teruggeskryf.

Ander mense het gesê hulle sal nie meer Castle Lager koop of die maatskappy ondersteun nie aangesien die maatskappy duidelik op hierdie manier standpunt ingeneem het ten opsigte van die Willemse-sage.

Ander meen Castle Lager wil slegs deur dié veldtog munt slaan uit die voorval om sy produk te bemark. Castle Lager het herhaaldelik op die kritiek gereageer deur te sê dat stereotipes skeiding tussen mense veroorsaak en dat hulle daarom mense wil aanmoedig om nie ander te etiketteer nie.

Enkele sosialemediagebruikers het wel gesê dit is ʼn goeie inisiatief om bewusmaking te skep rakende rassespanning in Suid-Afrikaanse sport.

Business Insider berig Vaughan Croeser, die handelsmerkdirekteur van Castle Lager, het aan die nuuswebwerf bevestig dat die etiketlose bier op 9 Junie tydens die rugbytoets tussen Suid-Afrika en Engeland “op ʼn beheerde manier” verkoop sal word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

160 Kommentare

jongste oudste gewildste
Noelene

Ironies genoeg plak Castle deur hul optrede juis n etiket op Mallet en Botha. Dit mis half die doel van hul veldtog?

Thinus Erasmus

So is “wit man van apartheidsjare” ook ‘n LABEL of nie?

christa

Castle Lager sal beter doen om dat geen etiket op sy bottels te plaas nie. Julle is besig om alles uit verband te ruk. Gelukkig het ek geen behoefte om drank te koop of te drink nie.

Denise

Ag asseblief hoe kleinlik hou julle bier dit is in elkgeval flou verby ek is so siek van die rasse ding soms is ek lus en verf myself groen !!!!

anarchy

Budweiser hier kom ons!