(Foto: clicksgroup.co.za)
Die Clicks-groep het Vrydag om verskoning gevra ná ʼn herrie op sosialemediaplatforms losgebars het oor ʼn advertensie waarin oënskynlik neerhalend na swart mense se natuurlike hare verwys is.
In die advertensie word die byskrifte “frizzy & dull” en “dry & damaged” gebruik by die foto’s van swart vroue se natuurlike hare, terwyl die byskrifte “fine & flat” en “normal” by foto’s van wit vroue se hare gebruik word.
Talle Twitter-gebruikers het dit as minagtend teenoor swart mense bestempel. Sommige gebruikers het gevra dat die groep geboikot word, terwyl een gebruiker daarop aangedring het dat Clicks skadevergoeding betaal.
Clicks must apologize in an African way, they must pay damages to the people. That means they must donate some money to NGOs that work in townships
Clicks must also provide African hair products to girls in township schools.
We can’t accept these tweet apologies.
— African Podcaster. (@MightiJamie) September 4, 2020
The last time some multinational retail store undermined black people like this there were major consequences. Clicks is applying for consequences. This is unacceptable. pic.twitter.com/VexJROqbin
— Floyd Shivambu (@FloydShivambu) September 4, 2020
Ook Mej. Heelal, Zozibini Tunzi, het die advertensie veroordeel.
Not only is this disrespectful to black lives, it is also evidence of an absence of representation and diversity within the organization. And we are talking about a South Africa with a population of about 80% black people (stand to be corrected). No ways???? @Clicks_SA https://t.co/HWtfH40HCY
— Zozibini Tunzi (@zozitunzi) September 4, 2020
Clicks het in ʼn Twitter-boodskap om verskoning vir die advertensie gevra.
“Ons wil onvoorwaardelik om verskoning vra. Ons het die foto’s verwyder wat indruis teen alles waarin ons glo. Ons keur nie rassisme goed nie en is groot voorstanders van natuurlike hare. Ons weet ons moet beter vaar en onderneem om te verseker dat ons inhoud dié waarde beter weerspieël,” lui die inskrywing.
Clicks sê voorts hy erken hy het ʼn fout gemaak en vra om verskoning dat hy mense in die steek gelaat het.
Die advertensie is intussen van Clicks se webwerf verwyder.
“Ons besef dat ons ʼn rol speel in die skep van ʼn meer uiteenlopende en inklusiewe Suid-Afrika, beginnende met die inhoud op ons webwerf. Ons besef ons moet beter vaar en is groot voorstanders van natuurlike hare.
“Ons is werklik jammer en gaan strenger maatreëls op ons webwerf in werking stel.”
Die EFF het die advertensie intussen as “rassisties” bestempel en onder meer geëis dat die direkteure en werkers wat betrokke was by die advertensie se name bekend gemaak word. Die party het ook geëis dat diegene wat betrokke was by die advertensie, hetsy werkers of kontrakteurs, dadelik afgedank word.
Die EFF het gedreig om “alle Clicks-winkels in Suid-Afrika te sluit” as dit nie gedoen word nie.
Die advertensie is reeds onttrek.
