Herrie oor SA-jagter se ‘seekoei-uitdunning’ in Zambië

Theo De Marillac by ʼn seekoei wat langs die Luangwarivier in Zambië geskiet is. Foto: Kamisa Malipita

Theo De Marillac by ʼn seekoei wat langs die Luangwarivier in Zambië geskiet is. Foto: Kamisa Malipita

ʼn Zambiese diereregte-aktivis het gewaarsku tot 2 000 seekoeie langs die Luangwarivier in Zambië kan oor die volgende vyf jaar deur ʼn Suid-Afrikaanse professionele jagter doodgemaak word.

ʼn Foto van die jagter, Theo De Marillac van De Marillac Safaris, wat langs die karkas van ʼn seekoei staan, het opslae gemaak nadat dit deur ʼn fluitjieblaser wat homself “Friend of Wildlife” noem, uitgelek is.

Die foto vorm deel van ʼn paar foto’s wat afgelaai is van die Facebook-blad van Kamisa Malipita, ʼn werknemer van die Zambiese departement van nasionale parke en wild (DNPW). Ander foto’s wys hoe ʼn seekoei geskiet word toe hy in die rivier klim, plaaslike inwoners wat die dooie seekoeie slag en twee afgesnyde seekoeikoppe.

Die Zambiese owerhede het glo ʼn kontrak van vyf jaar aan De Marillac toegestaan om seekoeie langs die rivier vir uitdunning en trofeejag te skiet. Volgens die DNPW se webtuiste is die kontrak toegestaan as deel van ʼn uitdunningsprogram om die seekoeibevolking langs die Luangwarivier in die suide te beheer.

Diereaktiviste staan egter die program teen en beweer dit is slegs ʼn trofeejag-program wat as ʼn bevolkingsbeheerplan voorgehou word. ʼn Anonieme fluitjieblaser in Lusaka het aan African News Agency gesê die seekoeijaglisensie maak voorsiening vir tot 2 000 seekoeie om oor die volgende vyf jaar geskiet te word as deel van “getalle-beheer”.

“Op die oomblik verkoop die [Suid-Afrikaanse] professionele jagter die seekoeitrofeejagtogte aan buitelanders. Ten minste ses seekoeie is al doodgemaak sedert die program op 22 Mei 2016 begin het. Daar is dringende vrae oor die wettigheid van die uitreiking van die lisensies,” het die informant gesê.

Volgens die bron het die DNPW sedert Mei met ses gemeenskapshulpbronrade vergaderings gehou, waar hulle ingelig is dat troppe seekoeie, insluitend dragtige koeie en koeie wat nog kalfies het wat aan hulle drink, sal saam met hul kalfies doodgemaak word. Hy het gesê die onoordeelkundige jag kan seekoeie by die rivier uitroei en is ʼn oortreding van die Zambiese wet op natuurlewe, omdat buitelandse jagters betrokke is.

“Sover my kennis strek is daar geen omgewingsimpakstudies gedoen of ingedien nie. Plaaslike professionele safari-jagondernemers is woedend. Hierdie buitelandse jagter kan 400 seekoeie per jaar doodmaak. Die jagseisoen is vier maande lank. In hierdie tyd sal ʼn beduidende gedeelte van die seekoeibevolking in die Luangwa-vallei uitgeroei word.”

Paul Zyambo, die direkteur van DNPW, het bevestig ʼn seekoei-uitdunningsprogram is in suidelike Luangwa van stapel gestuur, maar wou nie kommentaar lewer oor die wettigheid van die program nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

16 Kommentare

jongste oudste gewildste
Justa

So gaan die uitroei van wild lewe ongestoord voort en dan wil jagters die leuen verkoop dat dit bewaring deur volhoubare bestuur is. is. Wat n klug spul.

Charlise Theron

Seekoeie eet hopeloos te veel mense in Africa!

FRANCOIS

Charlise, waar val jy uit ? Mense betree die habitat van die diere, en die seekoeie is herbivore en eet nie die mense nie.

Dries

Kan die aktiviste asb dieselfde bohaai opskop oor die moorde hier in SA ? Daar word meer mense vermoor hier as die paar seekoeie waarvan daar gepraat word.

Jan

Hierdie syfers maak nie sin nie. As die kwota 400 seekoeie per jaar is, en die jag seisoen is 4 maande – omtrent 120 dae – moet daar 3.33 seekoeie per dag geskiet word om die kwota te vul. Tog in die laaste 2 weke is daar net 6 geskiet vs die 46 wat gemiddeld geskiet sal moet word om by 400 p.a. uit te kom. Is die lawaai nie dalk ‘n bietjie oordrewe nie?