Herrie woed ná juffrou se ‘slaanvideo’

‘n Skermgreep uit die video.

Maroela Media het besluit om nie die video te plaas nie weens die ontstellende aard daarvan.

ʼn Herrie woed op sosiale media nadat verskeie video’s aan die lig gekom het waarin ʼn onderwyseres van ʼn kleuterskool in Carletonville aan die Wes-Rand ʼn kind by dié skool aanrand.

ʼn Video wat teen Donderdagmiddag op talle sosialemediaplatforms gedeel is, wys hoe dié onderwyseres ’n dogtertjie herhaaldelik oor haar kop en op die boude slaan. Die dogtertjie het vermoedelik op ʼn plastiekstoeltjie en -tafeltjie opgegooi waarna die onderwyseres haar dwing om dit skoon te maak en haar dan herhaaldelik bydam.

Maroela Media het vanoggend die video uit verskeie oorde ontvang waarop lesers ontstoke gereageer het. Lesers het geëis om te weet wie die onderwyseres in die video is en waarom daar nog nie teen haar opgetree is nie.

Luidens mediaberigte is daar nóg twee video’s wat die ronde doen van die onderwyseres waarin sy kinders hardhandig hanteer.

Panyaza Lesufi, die Gautengse LUR vir onderwys, het Donderdag sy skok oor die video uitgespreek en daarop aangedring dat die onderwyseres opgespoor word. “Walglik. Ek kon dit nie eers klaar kyk nie,” het die LUR in reaksie op die video op Twitter gesê.

Volgens Lesufi sal Nandi Mayathula-Khoza, die Gautengse LUR vir maatskaplike ontwikkeling, die nou omstrede kleuterskool vanmiddag besoek. Die departement het vanoggend op Twitter bygevoeg hy veroordeel die mishandeling van kinders ten sterkste.

Die skoolhoof van die kleuterskool was Donderdag nie bereikbaar te midde van die herrie nie.

Brig. Mathapelo Peters, woordvoerder van die polisie, het by navraag gesê die onderwyseres is reeds ʼn week gelede in hegtenis geneem. Die 40-jarige vrou, wie se naam nog nie bekend is nie, het op 28 Maart vlugtig in ʼn hof in Carletonville verskyn op aanklagte van die aanranding van ʼn minderjarige waarna sy op borgtog vrygelaat is.

Die vrou sal weer op 7 Mei in die hof verskyn, het Peters gesê.

‘n Skermgreep uit die video.

Volgens Peters bly die ondersoek van misdade wat teen kinders, vroue en ander kwesbare groepe gepleeg word, ʼn prioriteit vir die polisie. “Hierdie saak geniet dus prioriteit om geregtigheid te laat geskied,” het Peters verseker.

Die voorval volg maar ʼn dag nadat die Suid-Gautengse hooggeregshof ʼn ma en haar voormalige kêrel swaar gevonnis het wat skuldig bevind is op aanklagte wat verband hou met die dood van die driejarige baba Daniel van Johannesburg.

Baba Daniel se ma is tot effektief 20 jaar tronkstraf gevonnis weens kinderverwaarlosing. Die vrou se voormalige kêrel is lewenslange tronkstraf opgelê op aanklagte van moord en kindermishandeling.

Daniel is dood by sy huis aangetref nadat hy erg aangerand en met kookwater gebrand is. Hy het gebreekte bene, erge kneusplekke aan sy arms en gesig, kopbeserings en 60% brandwonde oor sy liggaam gehad. ʼn Forensiese patoloog het tydens die verhoor getuig die seuntjie het dié beserings opgedoen terwyl hy geleef het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

115 Kommentare

jongste oudste gewildste
skaam.haar

Ek kon daai video nie eers klaar kyk nie
dis belaglik siek Wie neem daai video en dan betaal n mens nog skool geld en jou kind word so aangerand
Daai arme klein lyfie is so benoud en vrees bevange
TRONKSTRAF IS NIE GROOT GENOEG STRAF VIR SO N SIEK MENS NIE

honoruable member

Mens raak naar as jy sien hoe hierdie vrou met die kind aangaan. Kyk ek hoop die ouers gaan sorteer die saaak met haar uit en ek hoop hierdie satan word summier gefire. Hoe gaan mens so met n weerlose kind aan.

Kattie

Kyk juffroutjie jy kan so bly wees dis nie my kindjie nie……… Hoe gaan jy slaap vanaand na jy weet wat jy gedoen het? Ek hoop hulle sluit jou toe en gooi die sleutel weg want jy hoort nie tussen kinders nie. Dis mense soos jy wat ons as ouers ‘n vrees gee om ons kinders na n skooltjie toe te vat. Ek hoop REGTIG die kind se ouers los dit nie daar nie. Ek hoop ook nie jy het self kinders nie want die arme goedjies. JYS ‘N MONSTER!!!!!!!!

Geskok

Dit was meer as een dogtertjie dit was 3 onskuldige kinders :-(

RS

Hoop sy word nie net oor die kole gehaal nie, maar oor groot berge vuur. My hart gaan uit na daai getraumatiseerde kindertjies.