Hof sê oor Pretoria-straatname

Argieffoto

Argieffoto

Die konstitusionele hof het Donderdag uitspraak gelewer in die saak tussen AfriForum en die Tshwane-metroraad oor die verandering van Pretoria se straatname.

Hoofregter Mogoeng Mogoeng het in sy uitspraak, wat deur agt ander regters onderskryf is, gesê die Tshwane-munisipaliteit mag die ou straatnaamborde verwyder.

Volgens Mogoeng het AfriForum nie voldoende bewys dat die verwydering van die ou straatname onherstelbare skade aan ʼn sekere gedeelte van die gemeenskap sal aanrig nie. Hy het gesê die howe behoort nie in te meng met munisipale sake bloot omdat een groep ongelukkig is daaroor nie.

“Ons kan nie ons gedeelde waardes, wat ons grondwetlike visie onderskryf, bereik as een ras amper altyd hul sin kry of ʼn byna absolute monopolie van respek en verering het nie,” het Mogoeng gesê. “Dit is ʼn resep vir die onwettige behoud van eksklusiewe voorreg, onverdiende oorheersing van die verlede en toekomstige vyandigheid in teenstelling met inklusiwiteit, versoening en die eenheid in diversiteit wat ons onderneem het om na te streef en te bereik.”

Volgens Mogoeng is Suid-Afrika die laaste Afrika-land wat bevry is uit ʼn stelsel “wat niks fout gesien het met die geïnstitusionaliseerde verdrukking van een rassegroep vir geen ander rede as die kleur van hul vel nie.”

“As gevolg hiervan was daar [tydens die apartheidsjare] skaars enige stad, dorp, straat of instansie met ʼn naam wat swart mense se leiers of hul instansies of kosbare geskiedenis vereer het nie. Meer as twee dekades na die bereiking van ons grondwetlike demokrasie, vereer amper alle name van stede, dorpe en strate steeds die argitekte van apartheid, helde en heldinne van ons onderdrukkende en skandelike koloniale verlede,” het hy gesê.

Hy het bygevoeg die Grondwet mag nooit misbruik word om werklike geregtigheid op tegniese gronde te probeer frustreer nie.

AfriForum het op 19 April 2013 ʼn tussentydse bevel gekry wat bepaal Pretoria se ou straatname moet binne 60 dae weer ingestel word, hangende ʼn hersieningsaksie wat AfriForum in 2012 van stapel gestuur het om die metroraad se besluit om 29 straatname te verander, tersyde te stel.

Die metroraad het sedert 2013 teen die saak geappelleer en die appèl is uiteindelik gedurende Mei 2015 voor ʼn volbank van drie regters in die Gautengse hooggeregshof in Pretoria aangehoor. Die hof het ten gunste van AfriForum bevind en beveel die raad moet die ou straatname saam met die nuwes behou, hangende die afhandeling van ʼn hersieningsaksie deur AfriForum.

Die metroraad het ná die saak verder misluk in sy aansoek om spesiale verlof na die appèlhof, waarna hulle ʼn aansoek by die konstitusionele hof ingedien het. Die saak is op 20 Mei 2016 in die konstitusionele hof aangehoor.

Die VF Plus het in reaksie op die hofuistpraak gesê hy betreur die hof se besluit en meen dit skep die geleentheid om op groot skaal van die Afrikaner se geskiedenis ontslae te raak.

Philip van Staden, VF Plus-LPW vir Gauteng, het gesê Afrikaners is nie selfsugtig en verdelend om te kla oor straatname wat verander nie, maar vra bloot almal in die land se geskiedenis moet gerespekteer word en beide die ou en nuwe name vertoon moet word om erkenning aan ʼn gedeelde geskiedenis te gee.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

52 Kommentare

jongste oudste gewildste
Liewe heksie

Solank jy wit is gaan jy nerens regkom nie sorry afriforum dit is wat met al jou sake gaan gebeur en moet my nie verkeerd verstaan nie ek is n lid by julle maar dit is vir nou die pad voorentoe

Ludwig

Maar een oplossing vir die behoud van enige Afrikaner kultuur.

Konsentreer politiek en lokalisme in Orania.

Ander Koos

Hierdie uitspraak bevestig net weer dat die Grondwethof nie teen die anc regering beleid sal gaan nie, ten spyte van meriete van die saak. Plaas vraagteken oor onafhanklikheid. Die les; moenie op die Grondwethof staaatmaak nie, feit is anc slaan die ghitaar, hoe vals ookal

Maddox

So volgens die Moegoeng knaap mag een ras nie bevoordeel word bo ‘n ander ras nie. Nou wat van AA en BEE?. Hoekom moet wittes die grootste gedeelte van die belasting las dra, so ook die munisipale belasting, waar is ons regte ?.. Oh ja ek het vergeet ons is mos wit en moet net bek hou, maar wag die dag gaan nog kom…….

Koos

Dit is nou ‘n bloedneus vir Afriforum die volgende is seker om Pretoria se naam ook te verander ons moet plekke soos Orania begin ondersteun sodat hulle kan ontwikkel na ‘n klein onafhanklike staat waar die Afrikaner sy eie identiteit en morele waardes kan uitleef