Hof steek ’n stokkie voor bankstaking

Argieffoto

Die bankwerkersvakbond Sasbo het Donderdag sy lede per SMS in kennis gestel dat die beplande landwye staking in die bankwese afgelas is, nadat Business Unity South Africa (Busa) wat die banke verteenwoordig, se dringende aansoek om ʼn interdik in die arbeidshof in Johannesburg aangehoor en goedgekeur is.

“Busa se interdik teen ons was suksesvol. Ons sal die hofuitspraak nakom en die protesaksie sal NIE op Vrydag 27 September plaasvind nie,” lui die SMS.

Sasbo en Cosatu het vroeër aangekondig dat hulle Vrydag teen werksverliese in die bankbedryf sou staak. Dié staking het gedreig om die bankwese, waaronder ook kitsbanke, in die land dán tot stilstand te bring.

Busa het aangevoer dat die protes onwettig en onbeskermd is en dat Sasbo en Cosatu hul artikel 77-kennisgewing moet onttrek. “Die vakbonde het beweer dat hulle ʼn artikel 77-kennisgewing ingedien het wat die staking wettig en beskermd maak, maar die kennisgewing is al in 2017 by die Nasionale Raad vir Ekonomiese Ontwikkeling en Arbeid (Nedlac) ingedien. Die kennisgewings is nie immergroen nie,” het Kaizer Moyane, die Nedlac-sameroeper vir Busa, aan Maroela Media verduidelik.

Moyane sê die regter, Hilary Rabini-Naicker, het bevestig dat Sasbo en Cosatu versuim het om die regte prosesse te volg en dat die staking afgelas is tot die regte stappe gedoen is om ʼn artikel 77-kennisgewing te bekom.

“As die vakbonde die regte prosedures volg, kan die staking steeds in die nabye toekoms plaasvind, maar die regter het ook gesê dit was belangrik vir Busa en Sasbo om nóú te beraadslaag om oplossings te vind. Die regter het die partye nou net in die regte rigting gewys,” het Moyane bevestig.

Hy het verder verduidelik dat die banke reeds gewillig was om oor die afdankings met die vakbonde te praat. Daar was ook deurlopend gesprekke oor die afdankings alvorens dit plaasgevind het, omdat die wet dit so in artikel 189 voorskryf.

Standard Bank het in Maart vanjaar aangekondig dat hy 1 200 werkers gaan afdank en 91 van sy takke gaan toemaak, terwyl Nedbank ook planne bekendgemaak het om 3 000 werkers af te lê. Absa het ook in daardie maand gesê dat hy 870 werkers sou afdank.

“Artikel 189 gee vakbonde soveel mag en het alle selfseggenskap by ondernemings weggeneem wanneer afdankings ter sprake is. ʼn Onderneming kan nie net lukraak besluite neem oor afdankings nie. Daar moet eers oorlegplegings plaasvind, die ondernemings moet hul redes vir die besluite uiteensit, dit moet regverdig en gegrond wees. Sasbo is ten volle bewus van hierdie regulasies,” het Moyane gesê.

Die idee dat ondernemings net mense uit die bloute afdank, is ʼn versinsel, het hy gesê. “As afdankings gemaak word sonder die regte prosedures, sal dit in die hof onwettig verklaar word. Die risiko bestaan ook dat die besluit omgekeer moet word.”

Nehawu, die vakbond vir onderwys, gesondheid en verwante werkers, het in ʼn verklaring gesê hy veroordeel Busa se aanvanklike besluit om die saak in die hof te bestry. Dit “bewys dat Busa [en die banke] ongetwyfeld nie omgee oor werkloosheid nie, en net daarop fokus om meer dividende te bekom”.

“Ons moet die bloedbad van werksverliese stuit. ʼn Gesamentlike poging is nou nodig om verdere werksverliese en werkloosheid te keer,” het Nehawu gesê.

Die staking sou opbou na die landwye Cosatu-staking wat op 7 Oktober gaan plaasvind.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

17 Kommentare

jongste oudste gewildste
Johann cb

Die Howe doen ‘n uitstekende werk om die land te “regeer”! Dank die hele huidige Regering af!

John

En toe moes die VBS-bank sy mense ook afdank, sy deure sluit en sy kliènte se geld… waar is dit? Maar in die geval is dit aanvaarbaar. Hoe so?

se net

Wel ek se as hul n bank toe maak op n dorp, gaan na die opponent toe. Hoe kan jy diens wil lewer as daar nie n tak is nie? Eerlik, sekere klagtes en hulp is net verkrygbaar binne in n tak. Onthou daar is baie ou mense wat niks weet van internet banking of selfoon banking nie. Ag sies, mense moet deur hul nek betaal vir bankdienste maar daar is nie eens n bank op hul dorp nie. My ouers is oud en moet 120km ver ry om net by n kitsbank geld te trek. Dit is nou al… Lees meer »

Santie

As soveel werke in die slag sou bly, stem ek saam dat hulle moet staak. Geen land kan bekostig dat soveel mense hul werk te laat verloor nie. Dan sit ons, die publiek met die telefoon en jy moet fyn luister waarheen om deurgeskakel te word om jouself te kan help. Wat het van klientediens geword? Dit is maar net die begin. Glo my.

Marinda

Baie dankie vir die howe wat die staking kon afweer. Die opsie om vir ‘n gedeelte van hulle salaris te werk maar steeds hulle werk behou, is nie vir vakbonde aanvaarbaar nie. Daar is heelwat instansies wat op hierdie wyse hulle werkers behou het. Wat maak hulle beter as ander? Indien die inkomste krimp, is daar menige wyses om die begroting tog te laat klop solank iemand sy werk met voordele kan behou en ‘n vaste inkomste het. Die vakbonde is nie hiervoor te vinde nie, want hulle inkomste word dan ook verminder. Hulle moet inderdaad begin dink hoe om… Lees meer »