Hofaansoek teen vuurwapenamnestie laat vaar

Argieffoto ter illustrasie

Die nasionale jag-en-skietvereniging van Suid-Afrika (NHSA) het die dringende aansoek wat hy verlede jaar by die hooggeregshof in Pretoria ingedien het om die jongste vuurwapenamnestie ter syde te laat stel, teruggetrek.

Die vuurwapenamnestietydperk het op 1 Desember verlede jaar begin en duur tot einde Mei.

Die NHSA wou met die hofaansoek die Suid-Afrikaanse Polisiediens (SAPD) dwing om met vuurwapenbelangegroepe in gesprek te tree ten einde ʼn sinvolle amnestieproses in werking te stel wat in belang van wetsgehoorsame burgers is.

Luidens ʼn verklaring deur Gun Free SA, ʼn organisasie wat hom toespits op ʼn vuurwapenvrye Suid-Afrika, is daar in die hofaansoek aangevoer dat die minister nie die korrekte proses gevolg het toe hy 2020 se vuurwapenamnestie aangekondig het nie, wat beteken dat die amnestie nie geldig is nie.

Die minister het egter in die dokumente aangedui dat die proses wel geldig is.

Die NHSA het verder aangevoer dat die vuurwapenamnestie die regte van vuurwapeneienaars skend wie se lisensies verval het en dus nou hul vuurwapens noodgedwonge moet inhandig totdat hulle weer oor ʼn geldige lisensie beskik.

Argieffoto: SAPD

Die minister dui in die dokumente aan dat lisensies wat reeds verval het, nie bloot hernu kan word nie en dat vuurwapeneienaars opnuut vir ʼn lisensie moet aansoek doen.

Luidens die dokumente verleen die amnestie in werklikheid regte aan vuurwapeneienaars aangesien die amnestie vrywillig is en vuurwapeneienaars van vervolging vrywaar indien hulle in besit van ʼn onwettige vuurwapen is.

Gun Free SA het die NHSA se besluit om die aansoek terug te trek, verwelkom.

Adèle Kirsten, direkteur van Gun Free SA, meen dit is duidelik uit vorige vuurwapenamnesties dat dit ʼn doeltreffende manier is om onwettige vuurwapens te herwin.

Volgens Kirsten is meer as 120 000 vuurwapens en 1,8 miljoen rondes ammunisie tydens die afgelope drie amnesties in Suid-Afrika herwin. Die amnesties is in 1994, 2005 en 2010 ingestel.

“Meer as een derde van die vuurwapens en ammunisie wat in die 2005- en 2010-amnestie herwin is, was onwettig. Die grootste bron van onwettige vuurwapens in Suid-Afrika is burgerlikes wie se wapens óf verloor óf gesteel is. Die minister se antwoorde wys daarop dat daar in 2018/19 altesaam 9 659 vuurwapens as verlore of gesteel aangemeld is, waarvan 607 (6,3%) deur die SA Polisiediens besit was. Die oorblywende 9 000 vuurwapens is deur Suid-Afrikaanse burgers verloor of gesteel,” sê Kirsten.

Dr. Herman Els, uitvoerende voorsitter van NHSA, het vroeër gesê die NHSA is daarvan oortuig dat die huidige amnestie niks goeds vir vuurwapeneienaars inhou nie. “Dit is duidelik dat die amnestie as instrument gebruik word om alle vuurwapeneienaars wie se vuurwapenlisensies verval het, onder onredelike druk te plaas om daardie vuurwapens by die polisie in te gee,” het Els gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

25 Kommentare

jongste oudste gewildste
Jaco

So kan enige iemand nou vir my meer duidelikheid gee op n vuurwapen handwapen) waarvan die lisensie verval het en wat hernu moet word wat die proses nou is en of dit ingehandig moet word hangende die aansoek of nie?

Johann Kriek

Maroela. Praat eerder met NHSA, wat die saak aanhangig gemaak het. Hoekom praat julle met GFSA wat bet mooi niks met die saak uit te waai het nie?

Volgens alles wat ek gesien het is die amnestie nie deur al die regte prosedures geneem voor dit aangekondig is nie.

Thinus

Moet nie julle vuurwapens inhandig nie, want dit beland net so in kriminele hande en julle ontwapen julself. Dink julle vir een oomblik die krimineel dien sy wapen in? Word wakker mense, julle word ‘n rat voor die oe gedraai en ek glo nie die minister se statistieke oor hoeveel vuurwapens SAPS lede verloor/verkoop het nie. Ek dink daardie persentasie is nie die volle waarheid nie.

francois

Jaco, sou ek graag ook wil weet, wat moet nou gedoen word,die wapens ingee wat se lisensie verval het en weer aansoek doen ?

Spookstorie

Gaan Gun Free SA nou verantwoordelikheid aanvaar indien iemand sy wapen inhandig en dan in n gewapende roof, met n onwettige wapen, beroof of gedood word? Of gaan kriminele ook hul wapens inhandig, soos die wetsgehoorsame burgers? Wie wil nou vir wie beskerm?