Hond waak lank langs eienaar se liggaam

Anne Ferreira. Foto: Via Facebook

ʼn Bejaarde vrou van Port Elizabeth se getroue hond het vermoedelik dae lank by haar liggaam gewaak nadat sy wreed in haar huis in Somerstrand vermoor is.

Anne Ferreira (83) se liggaam is Sondagoggend in die kombuis van haar huis in Kuruman Kloof-weg aangetref. Terwyl miljoene mense reg oor die wêreld Moedersdag gevier het, moes Ferreira se drie kinders op dié dag die skoknuus ontvang dat hul ma vermoor is.

Kapt. Johan Rheeder, woordvoerder van die polisie, het aan Maroela Media gesê ʼn groen Opel Corsa is omstreeks 07:00 Sondagoggend verlate buite Despatch opgemerk. ʼn Voorlopige ondersoek het aangedui dat die voertuig nie as gesteel aangemeld is nie en polisiebeamptes het die besonderhede van die eienaar van die voertuig nagespoor. Dit het hulle na die huis in Kuruman Kloof-weg gelei.

Volgens Rheeder het beamptes met hul aankoms daar Ferreira se liggaam deur ʼn venster opgemerk. “Sy was reeds oorlede. Daar was geen ooglopende aanduidings van die oorsaak van haar dood nie en dit sal deur die nadoodse ondersoek bepaal word. Die nadoodse ondersoek is vanoggend afgehandel, maar ons wag nog vir die verslag. Ons wil nie nou oor die oorsaak van dood bespiegel nie,” het Rheeder gesê.

Hy het gesê Ferreira was in die proses om te trek en die meeste van haar besittings was reeds in bokse gepak. “Die huis was egter baie deurmekaar en alles was rondgegooi. In dié stadium vermis ons nog net ʼn platskermtelevisie,” het hy gesê.

Herald Live berig Ferreira het onlangs ná baie oorreding ingestem om haar huis te verkoop en sou aan die einde van die maand na ʼn aftree-oord verhuis het.

Volgens Rheeder het Ferreira twee honde gehad, Tory en Trompie. “Tory is ʼn groot ras-hond en polisiebeamptes het al hul dae gehad om haar weg te kry van die oorledene se liggaam af. Tory het langs haar baas gelê en geknor as beamptes wou nader kom. Dit was ʼn gesukkel om haar daar weg te kry.”

Rheeder sê dit is nie duidelik in wie se sorg Tory en Trompie nou is nie.

Volgens Rheeder vermoed die polisie dat Ferreira moontlik reeds Donderdag aangeval is, aangesien iemand haar Vrydag by haar huis besoek het, maar geen antwoord gekry het nie.

ʼn Saak van moord word ondersoek en niemand is nog in hegtenis geneem nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

32 Kommentare

jongste oudste gewildste
marous

Daar is geen land ter wereld waar weerlose ou mense so uitgemoor word met die stilswyende goedkeuring van’n regering en opruiende aanhitsing van hul lakeie , soos in die plek nie.

honourable member

Diere is so getrou aan n mens. Hoop hulle kry n goeie huis. Sterkte aan die tannie se familie.

Lizelda

My hart gaan werklik uit na die familie, dit is so hartseer, soveel ma’s het oor die naweek hul lewens verloor. Die arme 2 honde is deur erge, erge trauma. Hoop hulle is in veilige bewaring met baie liefde en begrip.

verstaan nie

ek verstaan nie, sy is wreed aangeval maar “daar was geen ooglopende aanduidings van die oorsaak van haar dood nie…” baie teenstrydig. My innige meegevoel vir die familie en ek hoop nie die staatmaker honde eindig by DBV op nie

Tertia

Wat met die dame gebeur het is verskriklik, ek hoop egter dat iemand nou haar 2 honde sal vat en mooi na hulle sal kyk.