Die brand het verwoesting gesaai (Foto: Mark Smith of Milnerton-brandweer)
Meer as 42 informele strukture is verwoes en byna 140 mense dakloos nadat ’n brand Maandagaand in Dunoon, noord van Milnerton in die Wes-Kaap, uitgebreek het.
Jermaine Carelse, woordvoerder van Kaapstad se brand-en-reddingsdienste, sê nooddienswerkers is omstreeks 21:30 na die brand in Dumanistraat in Dunoon ontbied. Die brand het glo in een van die informele strukture uitgebreek.
Die polisie het nooddienswerkers na die toneel begelei.
Brandbestryders het die brand eers na middernag onder bedwang gebring (Foto: Mark Smith of Milnerton-brandweer)
“Altesaam 11 brandweerwaens en 45 brandbestryders het probeer om die brand te blus,” sê Carelse.
“Hulle het die brand kort ná middernag in bedwang gebring. Niemand is beseer nie.”
Volgens Charlotte Powell, woordvoerder van die Stad Kaapstad se rampbestuur, is nog geen noodbehuising beskikbaar gestel nie.
“Inwoners bly by familie en vriende. Die Suid-Afrikaanse agentskap vir maatskaplike sekerheid (Sassa) is gevra om humanitêre hulp te verleen,” het Powell gesê.
Ja, sterkte, wens dit niemand toe nie, maar vir my is brande nie meer iets vreemd is SA nie……