Honderde oud-Eskom-werknemers wil kragreus help

Douwe van Wyk (links) en George van der Merwe. Foto: Mia Slabbert

Die kundiges waarna minister Pravin Gordan opsoek is om Eskom te kom help, is reeds hier in Suid-Afrika en hulle steek in hulle massas hul hande op om die sukkelende kragreus met hul kennis en vaardigheid by te staan.

Só meen die vakbond Solidariteit na “oorweldigende” reaksie op hul konsep van ʼn kennisbank – waar opgeleide ingenieurs, ambagslui en kundiges wat voorheen in diens van Eskom was, kan registreer om na Eskom terug te keer – verlede week op hul webblad van stapel gestuur is.

Solidariteit het Donderdag twee voormalige werknemers van Eskom aan die media voorgestel. Die kundiges, Douwe van Wyk en George van der Merwe, het gesamentlik meer as 50 jaar se ondervinding by Eskom. Hulle is twee van sowat 10 200 wit werknemers wat tussen 1994 en 2002 genoodsaak was om Eskom te verlaat.

Hulle sê hulle is dankbaar vir die platform wat Solidariteit geskep het en steek hulle hande op om te help omdat hulle eenvoudig nie kan terugsit en kyk hoe Eskom inmekaar tuimel nie.

“Ons is nie meer jonk nie, maar ons wil so graag help. Ons tyd om te help hardloop eintlik uit. Ons sit met soveel kennis en vaardighede wat ons steeds saam met ons dra van ons jare by Eskom. Eskom was baie goed vir ons en ons is vandag wie ons is as gevolg van Eskom. Daarom wil ons help, ons wil ondersteun en ons wil ons kennis en vaardighede oordra,” het Van der Merwe (67) gesê.

George van der Merwe. Foto: Mia Slabbert

Van der Merwe het 47 jaar se ervaring in die distribusie- en transmissie‑industrie waarvan die eerste 26 by Eskom was waar hy as projeksiespesialis gewerk het en uiteindelik ʼn senior bestuursposisie in beide kragdistribusie en -transmissie beklee het. Hy is in die 90’s by Eskom weg as deel van Eskom se sogenaamde “plekmaak-strategie”. Volgens Van der Merwe moet die regering buite Eskom se enjinkamer gehou word.

“Eskom was op sy tyd ʼn reus en hy het nasionaal en internasionaal geskitter. Ons wil nie nou die Moses-rol by Eskom inneem nie, maar eerder die Aäron-rol wat die hande van Moses sterk gemaak het. Nederige diensrolle is by Eskom nodig om die mense wat daar is te motiveer en om ons kennis terug te ploeg,” het Van der Merwe gesê.

Die 69-jarige Van Wyk het in 1973 by Eskom as ʼn beurshouer begin en was tussen 2002 en 2004 die hoof uitvoerende beampte van Eskom Malawi. “Ek moes by Eskom in Malawi baie vinnig leer hoe mens ʼn gebreekte organisasie vat en hom heeltemal heelmaak sodat hy kommersieel kan wees. Dit was wel ʼn baie kleiner krisis as waarmee ons nou sit. Maar ek het ongelooflik baie geleer,” het Van der Merwe gesê.

“Ons was nog altyd trots op Eskom en dit is nou ons beurt om te help waar ons kan om Eskom weer die spoginstelling te maak was hy eens was. Dit gaan wel nie ʼn vinnige oplossing wees nie, maar as ons die geleentheid gegun word, kan ons dadelik begin om te help.”

George van der Merwe (voor) en Douwe van Wyk. Foto: Mia Slabbert

Volgens Van der Merwe is daar in die stadium soveel fasette in Eskom wat nie reg is nie en moet daar nou volgens ʼn prioriteitslys gewerk word om dinge van ʼn kant af aan te pak.

Die skep van die kennisbank het gevolg op pres. Cyril Ramaphosa en Gordhan se aankondiging dat kundige oud-Eskom-werkers, plaaslik en in die buiteland, gebruik moet word om Eskom se vaardigheidstekort te help verlig.

“Solidariteit is absoluut oorweldig en kry hoendervleis om te sien hoe gewone Suid-Afrikaners in hierdie afgelope week hul hande opgesteek en gesê het hulle is beskikbaar om met hulle jare se kennis en vaardighede vir Eskom in hierdie krisistyd te help,” het dr. Dirk Hermann, bestuurshoof van Solidariteit, gesê.

Dié kennisbank het binne enkele dae ʼn magdom kundigheid opgelewer van sowat 320 opgeleide en ervare beroepslui wat tussen hulle ongeveer 5 400 jaar se werkservaring het. “Hierdie terugvoer is baie inspirerend. Ek het self met ʼn klomp van hierdie mense gepraat en wat my dalk die meeste tref is hoe lojaal hierdie mense teenoor Suid-Afrika is.

“Dít terwyl Eskom spesifiek nie jare gelede lojaal teenoor hulle was nie. Hierdie mense wat hulself nou beskikbaar maak om in hierdie krisistyd te help, is ʼn Suid-Afrikaanse storie van hoop en saamstaan,” het Hermann gesê.

Dirk Hermann in gesprek met Douwe van Wyk (middel) en George van der Merwe (regs). Foto: Mia Slabbert

Van die groep mense wat hulle hande opgesteek het, is 33% ingenieurs en ʼn verdere 50% elektrisiëns, spesialiste in ambag, toerusting en kragopwekkingstelsels. Dié groep het saam meer as 334 geakkrediteerde kwalifikasies en het elk ʼn gemiddeld van 17 jaar se werksondervinding in die industrie. Daar is verder mense wat as gekwalifiseerde internasionale projekbestuurders werk en ook internasionale gesogte spesialiste in hulle velde is. Baie van die mense wat hulp verleen, is reeds afgetree, maar bereid om die land te dien ongeag persoonlike opofferings.

“Suid-Afrika is nou in ʼn krisis. Eskom het tussen 1994 en 2002 net te vinnig té veel vaardighede verloor en dit is skrikwekkend om te sien waar ons vandag sit. Ons moet nou almal ons trots in ons skoene druk om saam met mekaar hierdie krisis te erken en werklik iets daaraan te doen,” het Hermann gesê.

Indien jy ’n kundige of oud‑Eskom-werknemer is en jou hand wil opsteek, besoek gerus https://solidariteit.co.za/eskom-kennis/ vir meer inligting.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

82 Kommentare

jongste oudste gewildste
Andre

Mooi, nou moet julle skep manne.

Rooikop

Wonderlik dat die mense Eskom en SA wil kom help !!
Dit het jy nou van n spul mense wat nie weet wat hulle doen toe hulle al hierdie
puik personeel laat loop het om “plek te maak” vir onbevoegde mense ……..

Marius

Trots op julle dat julle help want hulle besef dat as ons nie help en die ligte gaan af sal misdaad ons mense eerste teiken,

RG

Dis wonderlik maar net jammer die Mag aan bewind sal eerder die kragreus in donkerte dompel eerder as om hierdie mense aan te stel. Kom ons hou die spasie dop… Indien hulle wel aangestel word sal dit my hoop in ons regering herstel.

Bronwyn

Wonderlik!!! Julle stel ‘n goeie voorbeeld vir die jong klomp…. Ons sit met wonderlike talente in Suid Afrika het gebruik dit. En les wat ek vandag weer geleer het…. dit help nie om te sit en kla nie… as daar ‘n platvorm is doen iets… moenie net sit en kla nie.. Dankie manna en almal wat betrokke is.