Die brand het die huis vernietig (Foto: ALS Paramedics Medical Services, Facebook)
ʼn Huis in Bellair, KwaZulu-Natal, is Donderdagoggend in ʼn brand vernietig. Die gesin se drie hondjies wat in die huis was ten tyde van die brand, is nou soek.
Garrith Jamieson, woordvoerder van ALS Paramedics, sê die brand het net voor 08:00 in die huis in Blairmont-straat in Bellair uitgebreek. Hy kon nie sê presies in watter vertrek die brand uitgebreek het nie.
Die gesin se hondjies is steeds vermis (Foto: ALS Paramedics Medical Services, Facebook)
“ALS-paramedici en die Ethekwini-brandweer het by hul aankoms op die toneel die huis in vlamme aangetref. Die brandweer het gespook om die brand in bedwang te bring,” sê Jamieson.
“Dit is nie duidelik hoeveel mense in die huis was nie, maar paramedici het een man vir rookinaseming behandel.”
Volgens Jamieson vermoed hulle die gesin se drie vermiste hondjies is reeds dood.
Die omstandighede rondom die brand is in hierdie stadium onbekend en word deur die polisie en Ethekwini-brandweer ondersoek.
Maroela Media het navraag aan die polisie en brandweer gestuur, maar wag nog vir terugvoer.
Ai genade tog! Daar is deesdae net so baie huisbrande soos geboue in die res van die land! Hoop hulle kry die hondtjies iewers veilig.