Hoogste hof beslis pakslae tuis bly onwettig

Konstitusionele hof van Suid-Afrika (Foto: Stefan Schäfer, Lich – eie werk,via Wikemedia Commons)

Die Konstitusionele Hof het Woensdag bevestig dat lyfstraf in private huishoudings onwettig is.

Die regters van die Konstitusionele Hof het in ʼn meerderheidsuitspraak bevind dat aangesien kinders steeds doeltreffend gedissiplineer kan word sonder om matige en redelike tugtiging te gebruik, daar minder beperkende middele is om dissipline te bewerkstellig.

Die regters het bevind gemenereg-verdediging van redelike en matige tugtiging deur ouers is strydig met die bepalings van die Grondwet.

Die Konstitusionele Hof het in November verlede jaar ʼn aansoek deur Vryheid tot Godsdiens in Suid-Afrika (FOR SA) aangehoor waarin versoek is dat ʼn hooggeregshofuitspraak van 2017 waarin beslis is dat lyfstraf in private huishoudings onwettig is, ter syde gestel word.

Maroela Media het vroeër berig die hooggeregshof se uitspraak is gelewer in ʼn saak teen ʼn Moslem-pa wat sy seun tuis geslaan het omdat hy na bewering na pornografie gekyk het. Die man is skuldig bevind op twee aanklagte van aanranding met die doel om ernstig te beseer. Hy het appèl aangeteken teen die skuldigbevinding en die kwessie van “redelike tugtiging” van ʼn kind by die huis het tydens die appèl onder die vergrootglas gekom.

Regter Raylene Keightley het egter bevind “die gemenereg-verdediging van redelike tugtiging is ongrondwetlik en is nie meer van toepassing in ons wetgewing nie”. Keightley het in die hofuitspraak gesê lyfstraf is nie net onwettig in skole en private huishoudings nie, maar kan ook nie op grond van geloofsoortuiging geregverdig word nie.

Daniela Ellerbeck, regsverteenwoordiger vir FOR SA, het vroeër gesê die hooggeregshofuitspraak  “sal misdadigers maak van goedbedoelende ouers wat lief is vir hul kinders en net die beste vir hulle wil hê”.

Ellerbeck het gesê die hooggeregshofuitspraak het in wese tot gevolg gehad dat indien ʼn ouer hul kind net ʼn ligte klap op die gewrig gee, die ouer in hegtenis geneem, vervolg en skuldig bevind kan word.

“Behalwe dat die ouer ʼn lewenslange kriminele rekord sal hê vir die mishandeling van sy eie kinders, sal die kinders uit die ouerhuis verwyder word oor ʼn nietige, onskadelike klap. ʼn Mens kan jou net indink watter skade dit aan families in Suid-Afrika sal doen,” het sy verduidelik.

Volgens Ellerbeck is FOR SA ten sterkste gekant teen enige vorm van geweld teen kinders, maar moet daar ʼn duidelike onderskeid getref word tussen geweld en mishandeling, en ligte, onskadelike lyfstraf. “Vir miljoene Suid-Afrikaners wat glo dat die heilige teks lyfstraf toelaat – indien nie selfs voorskryf nie – is fisieke tugtiging van hul kinders, waar nodig, in die beste belang van hul kinders.”

Regter Keightley het verlede jaar in haar uitspraak beklemtoon dat die doel nie is om ouers van ʼn misdaad aan te kla nie, maar eerder om hulle te lei om meer positiewe en doeltreffende maniere te vind om hul kinders te dissiplineer. Ellerbeck meen egter ouers het méér ouerskap-hulpmiddels nodig om hul kinders groot te maak, nie minder nie.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

219 Kommentare

jongste oudste gewildste
Jack

Spreuke 20:30.

Gert

Die uitspraak wys ook uit dat die stelsel inmeng in wat in die privaatheid van jou eie huis gebeur (waar daar nie gemeenregtelike misdaad ter sprake is nie).

Die probleem is met die grondwet self.

Buigdieboompie

Reken ek sal dan maar krimineel word om te keer dat my kinders deel word van die gemors wat in die land aan die gang is. Sal van hulle opregte goeie mense maak soos my pa met my gesoen het. Pakslae ops y tyd nog net goed gedoen.

Kabous

Regter Keightley is die kluts kwyt. Die Woord sê in die eindtyd sal wat altyd reg was, verkeerd wees, en wat altyd verkeerd was, reg wees. Die profesie is vervul… eienaardige wêreld waarin ons leef – danksy progressiewe liberalisme.

Outoppie

Kyk hoe vol is ons tronkke. Kinders wat nie pak gekry het nie