Horner-besoek: ‘Regering neem landelike veiligheid ernstig op’

Bheki Cele, minister van polisie, en Ayanda Dlodlo, minister van staatsveiligheid, ontmoet Brendin Horner se geliefdes. (Foto: Lirandzu Themba/Twitter)

Die regering het ’n beroep op die landelike gemeenskap gedoen om in hierdie tydperk kalm te wees en wetstoepassingsagentskappe die geleentheid te bied om hul werk te doen.

Bheki Cele, minister van polisie, en Ayanda Dlodlo, minister van staatsveiligheid, het die vermoorde Brendin Horner se ouers, Robbie en Mietjie, Dinsdag besoek. Die jong voorman se werkgewer, Gilly Scheepers, en sy vriendin, Lenize Taljaard, was ook teenwoordig.

Cele en Dlodlo het hul meegevoel betuig en die versekering gegee dat die regering alles in sy vermoë doen om te verseker dat daar geregtigheid vir Brendin is.

“Ons waardeer die besoek en ons hoop regtig dit sal ʼn keerpunt wees rakende die spanning in die omgewing. Dit is ongelukkig, maar miskien kan die verlies van ʼn jong man se lewe vrede en stabiliteit in die boerderygemeenskap tot gevolg hê,” het Scheepers gesê.

Die regering het ook sy medelye betuig met al die families, vriende, kollegas en bure van alle boere en plaaswerkers wat vermoor of aangeval is. Die ministers het gemeenskappe en die polisie geloof vir hul vinnige optrede om oortreders vas te trek en aan die pen te laat ry.

Brendin Horner (21), ‘n plaasbestuurder, is wreed vermoor. (Foto: Facebook)

Brendin se vermeende moordenaars sal weer Vrydag in die hof verskyn en die regering het ʼn beroep op lede van die gemeenskap gedoen om kalm te bly en nie die wet te oortree of die reg in eie hande te neem nie. Wetstoepassingsagentskappe sal by die hof wees om wet en orde te handhaaf.

“Die regering neem landelike veiligheid ernstig op,” het die twee ministers in ʼn verklaring gesê na afloop van hul besoek. “Dit is duidelik gemaak deur die onlangse bekendmaking van nasionale en plaaslike gesamentlike bevelsentrums vir landelike veiligheid waarop die SAPD en die boerderysektor ooreengekom het.”

Volgens die ministers veroordeel die regering geweld en diegene wat ander mense vermoor. “Dit is nie net van toepassing op boere en plaaswerkers nie, maar ook op lede van die samelewing in die algemeen. Boere en plaaswerkers is die ruggraat van ons ekonomie en niks kan die misdadige aktiwiteit wat met hierdie aanvalle en moorde gepaardgaan, regverdig nie. Die sinnelose moorde op boere en hul werkers raak alle Suid-Afrikaners en bedreig voedselsekerheid, indiensneming, ekonomiese groei en werkskepping.”

Die veiligheid en stabiliteit van boerderygemeenskappe is kritiek om Suid-Afrika van kos te voorsien en werk te skep. “Misdadigers buit die boeregemeenskap uit vanweë hul isolasie omdat hulle nie naby ander gemeenskappe is nie. Die regering is besig om die implementering van die hersiene strategie vir landelike veiligheid te bespoedig ten einde te reageer op die veiligheidsbehoeftes van landelike gemeenskappe, sowel as om maatskaplike en ekonomiese ontwikkeling te ondersteun.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

39 Kommentare

jongste oudste gewildste
Trotse Boervrou

Dit is 26 jaar te laat….

twaalfboor

Talk is cheap Cele.

Persheks Adri

Ons is NÊRENS veilig nie neem kennis van dit en dis bloed op jou en jou kaders se hande!

Die hele mag gaan seker daar wees saam met die rooi petters wat rassisme aan hits genade so ek hoop die blou manne verjaag hulle mmmmmmm ek wonder…

Pieter

Nog mooi leë woordjies wat op geen dade gaan uitloop nie, dankie weereens vir niks cyril.

Gysbert

Ek sal nie eens n DA of VF politikus in my huis toelaat nie. Wat nog te sê n ANC politikus.